ગુજરાતની જીવાદોરી સમાન નર્મદા ડેમ આજે સંપૂર્ણ છલકાશે, જાણો કેટલે પહોંચી સપાટી

Narmada Dam Water Level : ગુજરાતની જીવાદોરી સમાન સરદાર સરોવર નર્મદા ડેમ હવે સંપૂર્ણ ભરાવાની અણી પર પહોંચી ગયો છે. ડેમની જળસપાટી વધીને 138.61 મીટર પર પહોંચી છે. ડેમની મહત્તમ જળસપાટી 138.68 મીટર હોવાથી હવે સંપૂર્ણ ભરાવા માટે માત્ર 7 સેન્ટિમીટર બાકી રહી છે. હાલ ડેમ 99.50 ટકા ભરાઈ ગયો છે અને આજે બપોરે ડેમ સંપૂર્ણ ભરાઈ જવાની શક્યતા છે. નર્મદા ડેમમાં ઉપરવાસમાંથી સતત પાણીની આવક થઈ રહી છે. હાલ ઉપરવાસમાંથી 43,659 ક્યુસેક પાણી આવી રહ્યું છે. ડેમમાં હાલમાં 5,737.46 એમસીએમ જળસંગ્રહ છે. પાણીની આવકને ધ્યાનમાં રાખીને ડેમમાંથી હાલ 11,564 ક્યુસેક પાણી છોડવામાં આવી રહ્યું છે.

ત્રણ ટર્બાઇનથી વીજ ઉત્પાદન

નર્મદા ડેમ ખાતે વીજ ઉત્પાદન પણ ચાલુ છે. હાલ કેનાલ હેડ પાવર હાઉસની ત્રણ ટર્બાઇન દ્વારા વીજ ઉત્પાદન થઈ રહ્યું છે. જોકે, રિવર બેડ પાવર હાઉસની તમામ ટર્બાઇન બંધ છે. નર્મદા ડેમ ગુજરાત માટે પીવાના પાણી, સિંચાઈ અને વીજ ઉત્પાદનની દૃષ્ટિએ મહત્વપૂર્ણ છે. રાજ્યના અન્ય જળાશયોની સરખામણીમાં નર્મદા ડેમને ગુજરાતની જીવાદોરી તરીકે ઓળખવામાં આવે છે. ડેમમાં પાણીનો જથ્થો વધતાં રાજ્યના વિવિધ વિસ્તારો માટે પાણીની ઉપલબ્ધતાને લઈને પણ રાહતની સ્થિતિ સર્જાઈ છે. સરદાર સરોવર ડેમની કુલ રચનાત્મક માહિતી મુજબ તેની જળસંગ્રહ ક્ષમતા અને વીજ ઉત્પાદન ક્ષમતા ગુજરાતના જળવ્યવસ્થાપનમાં મહત્વપૂર્ણ સ્થાન ધરાવે છે.