લગ્નમાં રોજનો કંકાસ ક્રુરતા નથી, તેના લીધે છૂટાછેડા ન મળે

બોમ્બે હાઈકોર્ટે પતિની છૂટાછેડાની અરજી ફગાવી

લગ્નમાં ક્રૂરતા નાના-નાના કિસ્સાઓ દ્વારા નક્કી કરી શકાતી નથી અને સમગ્ર લગ્ન જીવનનું મૂલ્યાંકન જરૃરીઃ હાઈકોર્ટ 

મુંબઈ -  લગ્નજીવનમાં બદલાતી ગતિશીલતા સાથે, ફક્ત ચીડ અને સામાન્ય મતભેદો માનસિક ક્રૂરતા કે છૂટાછેડા માટેનો આધાર નથી, એમ બોમ્બે હાઈકોર્ટે એક પુરુષને છૂટાછેડા આપવાનો ઇનકાર કર્યો છે. અરજીમાં તેણે દાવો કર્યો હતો કે તેની પત્ની તેની અને તેની માતા સાથે ઝઘડો કરતી હતી.

  ન્યાયાધીશ ઉમલા જોશી ફાળકે અને રાજ વાકોડેની બનેલી હાઇકોર્ટની નાગપુર બેન્ચે અવલોકન કર્યું કે ક્રૂરતા એટલી હદે હોવી જરૃરી છે કે તેને લીધે દંપતી હવે સાથે રહી શકશે એ બિલકુલ અપેક્ષિત જ ન હોય..

કોર્ટે એમ પણ કહ્યું કે લગ્નમાં ક્રૂરતા થોડા અલગ-અલગ કિસ્સાઓ દ્વારા નક્કી કરી શકાતી નથી અને સમગ્ર લગ્ન જીવનનું મૂલ્યાંકન એકંદરે થવું જોઈએ.

 આપણી આસપાસના જીવનમાં અને વૈવાહિક ફરજો અને જવાબદારીઓમાં પણ નોંધપાત્ર ફેરફારો થયા છે, એમ જણાવતાં ઉમેર્યું હતું કે એક કિસ્સામાં ક્રૂરતા બીજા કિસ્સામાં ન પણ હોય.

 કથિત ક્રૂરતા મોટાભાગે પક્ષકારો કેવા પ્રકારનું જીવન જીવી રહ્યા છે અથવા તેમની આથક અને સામાજિક પરિસ્થિતિઓ પર આધાર રાખે છે. તે તેમની સંસ્કૃતિ અને માનવીય મૂલ્યો પર પણ આધાર રાખે છે જેને તેઓ મહત્વ આપે છે,એમ હાઈકોર્ટે જણાવ્યું હતું.

કોઈપણ લગ્નમાં ઝઘડા અને મતભેદનો સામાન્ય હિસ્સો હોય છે, અને તેથી ક્રૂરતા, ખાસ કરીને માનસિક ક્રૂરતાને સ્પષ્ટપણે અલગ પાડવી જોઈએ, એમ તેમાં નોંધવામાં આવ્યું છે.

  ક્રૂરતાના આધારે છૂટાછેડા આપવાનો ઇનકાર કરતા અને તેની પત્નીને દર મહિને ૫,૦૦૦ રૃપિયા ભરણપોષણ આપવાનો આદેશ આપતા ફેમિલી કોર્ટના આદેશને પડકારતી ૪૪ વર્ષીય વ્યક્તિ દ્વારા દાખલ કરાયેલી અરજીને હાઇકોર્ટે ફગાવી દીધી હતી.

આ દંપતીએ ૨૦૦૩ માં લગ્ન કર્યા હતા. જ્યારે પુરુષે દાવો કર્યો હતો કે તેની પત્નીએ ૨૦૧૧ માં તેના અને તેના માતાપિતા પર માનસિક ક્રૂરતા કર્યા બાદ પછી લગ્નનું ઘર છોડી દીધું હતું, ત્યારે પત્નીએ કહ્યું હતું કે તે તેના પતિના ઘરે પાછી ફરી હતી, પરંતુ પતિએ તેની સાથે રહેવાનો ઇનકાર કર્યો હતો.

આ વ્યક્તિએ આરોપ લગાવ્યો હતો કે તેની પત્ની ગુસ્સે ભરાયેલી હતી, તે નિયમિતપણે તેની માતા સાથે નાની નાની બાબતોમાં ઝઘડો કરતી હતી અને ગર્ભધારણ ન કરી શકવા માટે પણ તેના પર આરોપ લગાવતી હતી.

મહિલાએ દાવો કર્યો હતો કે તેનો પતિ અને તેનો પરિવાર ગર્ભધારણ ન કરી શકવાને કારણે તેની સાથે ખરાબ વર્તન કરતા હતા.