શાવરમાંથી ધીમું પાણી આવે છે? પ્લમ્બર બોલાવ્યા વગર 10 રૂપિયાની આ વસ્તુથી મિનિટોમાં દૂર કરો ક્ષાર

Showerhead Cleaning Hacks: શું તમારા ઘરમાં પણ દરરોજ સવારે શાવરમાંથી પાણી ન આવવાને કારણે હેરાનગતિ થાય છે? અથવા જ્યારે તમે નહાવા માટે શાવર ચાલુ કરો છો, ત્યારે પાણીનો પ્રવાહ અગાઉ જેવો ઝડપી નથી આવતો? ઘણીવાર પાણી એક તરફથી વધુ બહાર આવે છે અથવા શાવરના અમુક કાણાંમાંથી પાણીના ટીપાં આડાઅવળા નીકળે છે. જો તમારી સાથે પણ આવું બની રહ્યું હોય, તો એ જરૂરી નથી કે ટાંકીમાંથી પાણીનું પ્રેશર જ ઓછું થઈ ગયું હોય. ઘણીવાર આનું સાચું કારણ શાવરના નાના-નાના છિદ્રોમાં જામી ગયેલો ક્ષાર (ચૂનો) અને ખારા પાણીમાં રહેલા મિનરલ્સ હોય છે.

શાવરના કાણાંમાં ક્ષાર અને ચૂનો કેમ જામી જાય છે?

હાર્ડ વોટર એટલે કે ક્ષારવાળા પાણીમાં કેલ્શિયમ અને મેગ્નેશિયમ જેવા મિનરલ્સનું પ્રમાણ ખૂબ વધારે હોય છે. સમય જતાં આ મિનરલ્સ શાવરહેડના ઝીણાં છિદ્રો અને પાઇપમાં જમા થવા લાગે છે અને ધીમે-ધીમે પાણીનો માર્ગ બંધ કરી દે છે. તેની અસર પાણીની ધાર પર સ્પષ્ટ દેખાય છે. આ જ કારણ છે કે શાવર ચાલુ કરવા છતાં પાણી સરખી રીતે બહાર નથી નીકળતું અને પ્રેશર પણ ઓછું અનુભવાય છે.

બેકિંગ સોડા અને વિનેગર સિવાય સાઇટ્રિક એસિડ પણ છે અત્યંત અસરકારક

આવી સમસ્યા સામે આવે ત્યારે સામાન્ય રીતે લોકો બેકિંગ સોડા અથવા વિનેગર (સરકો)નો ઉપયોગ કરતા હોય છે, પરંતુ માત્ર આ બે જ વસ્તુઓ આ સમસ્યા માટે પુરતી નથી. આ સિવાય સાઇટ્રિક એસિડ પણ એક ઉત્તમ વિકલ્પ છે, જે શાવરના બંધ થઈ ગયેલા કાણાંને ખોલવામાં ખૂબ જ અસરકારક સાબિત થાય છે. કોઈપણ પ્લમ્બરને બોલાવ્યા વગર અને મોટો ખર્ચ કર્યા વિના તમે ઘરે બેઠા જ અત્યંત સસ્તામાં શાવર સાફ કરીને પાણીનું પ્રેશર પૂર્વવત કરી શકો છો.

શાવરહેડ સાફ કરવાની સરળ રીત:

• એક વાસણમાં નવશેકું (હૂંફાળું) પાણી લો અને તેમાં 2-3 મોટી ચમચી સાઇટ્રિક એસિડ ઉમેરીને બરાબર મિક્સ કરી લો.
• જો શાવરહેડ સરળતાથી નીકળી શકે તેમ હોય, તો તેને પાઇપથી અલગ કરી લો.
• હવે શાવરહેડને સાઇટ્રિક એસિડવાળા આ પાણીમાં આશરે 30 મિનિટથી 1 કલાક સુધી પલાળી રાખો.
• ત્યારબાદ એક જૂના ટૂથબ્રશની મદદથી શાવરના કાણાં પર જામી ગયેલા ક્ષાર કે કચરાના થરને હળવા હાથે ઘસીને સાફ કરી લો.
• છેલ્લે શાવરહેડને ચોખ્ખા પાણીથી સારી રીતે ધોઈ લો અને તેને પાછો પોતાની જગ્યાએ લગાવી દો.

ફિક્સ્ડ શાવરહેડની સફાઈ આ રીતે કરો

જો તમારા ઘરમાં શાવરહેડ પાઇપથી અલગ ન થઈ શકતો હોય, તો પણ તેની સફાઈ કરવી અત્યંત સરળ છે. આ માટે એક પ્લાસ્ટિકની થેલીમાં નવશેકું પાણી અને સાઇટ્રિક એસિડનું મિશ્રણ ભરો. હવે આ થેલીને શાવરહેડ પર એવી રીતે બાંધી દો જેથી તેના બધા જ કાણાં આ લિક્વિડમાં ડૂબેલા રહે. થોડો સમય તેને આમ જ રહેવા દીધા પછી થેલી હટાવી લો અને શાવરને ચોખ્ખા પાણીથી સારી રીતે સાફ કરી લો.

પ્લમ્બર અને નવા શાવરનો ખર્ચ બચાવો

શાવરના પાણીનો પ્રવાહ સતત યોગ્ય જાળવી રાખવા માટે માત્ર એક વાર સફાઈ કરવી પૂરતી નથી. તેના બદલે મહિનામાં ઓછામાં ઓછી એક વાર શાવરહેડની સફાઈ કરવી અને જો પાણી વધુ પડતું ખારું (હાર્ડ) હોય તો એન્ટી-લાઈમસ્કેલ સિસ્ટમ કે ફિલ્ટર લગાવવું હિતાવહ છે. શાવરમાંથી પાણીનું પ્રેશર ઓછું થાય ત્યારે તુરંત પ્લમ્બરને બોલાવવા કે નવો શાવર ખરીદવાને બદલે આવી નાની-નાની બાબતોનું ધ્યાન રાખવાથી મોટી પરેશાની અને ખર્ચથી બચી શકાય છે.