ફરી ટ્રેડ વોરનું ભૂત ધૂણ્યું: ટ્રમ્પે ભારત સહિત 60 દેશો પર 10થી 12.5 ટકા ટેરિફ ઝીંક્યો

અમેરિકાના પ્રમુખ ડોનાલ્ડ ટ્રમ્પ પ્રશાસને વેપાર નીતિમાં મોટો ફેરબદલ કરતા ભારત સહિત વિશ્વના 60 દેશો પર 10% થી લઈને 12.5% સુધીનો નવો ઇમ્પોર્ટ ટેરિફ (આયાત જકાત) લાદવાની જાહેરાત કરી છે. અમેરિકી તંત્રના જણાવ્યા અનુસાર, બંધુઆ મજૂરી (Forced Labour) થી બનતા સામાન પર યોગ્ય પ્રતિબંધ અને તેનો કડક અમલ ન કરવા બદલ આ પગલું લેવામાં આવ્યું છે.

ફેડરલ રજિસ્ટર નોટિસ અનુસાર, આ નવો ટેરિફ શુક્રવારે રાત્રે 12.01 વાગ્યે EDT (ભારતીય સમય મુજબ શનિવારે સવારે 9.31 વાગ્યે) થી લાગુ થઈ જશે, જે આ સમયે જ પૂરા થઈ રહેલા અસ્થાયી 10% ગ્લોબલ ટેરિફનું સ્થાન લેશે.

ભારત સહિત 18 દેશો પર 10% ટેરિફ

નવી નીતિ હેઠળ ભારતને 10% ના ટેરિફ સ્લેબમાં રાખવામાં આવ્યું છે. ભારત ઉપરાંત બ્રિટન, કેનેડા, મેક્સિકો, આર્જેન્ટિના, બાંગ્લાદેશ, પાકિસ્તાન, શ્રીલંકા, ઇન્ડોનેશિયા અને મલેશિયા જેવા 18 દેશો પર 10% જકાત લાગશે.

બીજી તરફ, યુરોપિયન યુનિયન (EU), જાપાન, દક્ષિણ કોરિયા, તાઇવાન અને સ્વિટ્ઝરલેન્ડ પર 10% થી 12.5% નો સંયુક્ત ટેરિફ લાગુ થશે, જ્યારે ચીન સહિત બાકીના 38 દેશોએ 12.5% નો ટેરિફ ચૂકવવો પડશે.

અમેરિકા પાસે લગભગ એક સદીથી બંધુઆ મજૂરીથી બનતી વસ્તુઓ પર આયાત પ્રતિબંધનો કાયદો છે અને અમે તેનો સખત અમલ કરીએ છીએ. અમારા વેપારી ભાગીદારો પણ આવું જ કરે તે સમય આવી ગયો છે.

— જેમીસન ગ્રીર (અમેરિકી વેપાર પ્રતિનિધિ - USTR)

સુપ્રીમ કોર્ટના ઝાટકા બાદ કલમ 301 નો ઉપયોગ

અગાઉ ફેબ્રુઆરી મહિનામાં યુએસ સુપ્રિમ કોર્ટે ટ્રમ્પ પ્રશાસન દ્વારા ઇમરજન્સી પાવર્સ હેઠળ લાદવામાં આવેલા 10% થી 50% ના 'રેસિપ્રોકલ ટેરિફ' ને રદ કરી દીધા હતા. તેથી, આ વખતે ટ્રમ્પ સરકારે 1974 ના ટ્રેડ એક્ટની કલમ 301 (Section 301) નો ઉપયોગ કર્યો છે, જેથી આ નિર્ણયને કોર્ટમાં સહેલાઈથી પડકારી ન શકાય.

વિશ્વભરના દેશોમાં વિરોધનો સૂર

અમેરિકાના આ આકરા નિર્ણય સામે વિશ્વના અનેક દેશોએ વિરોધ નોંધાવ્યો છે:

• નોર્વે: નોર્વેએ જણાવ્યું કે તેમની પાસે બંધુઆ મજૂરી સામે અગાઉથી જ સખત નિયમો છે, તેથી આ જકાત અયોગ્ય છે.
• ઓસ્ટ્રેલિયા અને બ્રાઝિલ: બંને દેશોએ આ નિર્ણયને ગેરવાજબી ગણાવીને ટેરિફ પાછો ખેંચવાની માંગ કરી છે.
• કેનેડા: હાલમાં જ અન્ય યુએસ ટેરિફનો ભોગ બનેલા કેનેડાએ કહ્યું છે કે તે આ મુદ્દે અમેરિકા સાથે વાતચીત ચાલુ રાખશે.