ટ્રમ્પની હરકતથી ઝેલેન્સ્કી એલર્ટ ! યુરોપિયન નેતાઓને લઈને અમેરિકા જશે, વ્હાઈટ હાઉસમાં કરશે બેઠક

Trump And Zelenskyy Meeting : અમેરિકાના રાષ્ટ્રપ્રમુખ ડોનાલ્ડ ટ્રમ્પ રશિયા-યુક્રેનનું યુદ્ધ અટકાવવા માટે અનેક પ્રાયસો કરી રહ્યા છે. તેમણે તાજેતરમાં જ અલાસ્કામાં રશિયન રાષ્ટ્રપ્રમુખ વ્લાદિમીર પુતિન સાથે બેઠક યોજી હતી. આ બેઠકનો યુક્રેનના રાષ્ટ્રપતિ વોલોડીમીર ઝેલેન્સ્કીએ વાંધો ઉઠાવી કહ્યું હતું કે, અમારા વગર કોઈપણ ડીલ કરવી ખોટી કહેવાશે. હવે ટ્રમ્પ-પુતિનની બેઠક બાદ વધુ મહત્વપૂર્ણ રાજદ્વારી ઘટના બનવા જઈ રહી છે. ઝેલેન્સ્કી ટૂંક સમયમાં ટ્રમ્પ સાથે વ્હાઇટ હાઉસમાં બેઠક કરવાના છે, પરંતુ આ વખતે તેઓ એકલા નહીં હોય. આ બેઠકમાં તેમની સાથે ઘણા યુરોપિયન નેતાઓ પણ સામેલ થશે. સમાચાર એજન્સી એપીના અહેવાલ મુજબ, વ્હાઇટ હાઉસમાં પ્રસ્તાવિત આ બેઠકમાં યુક્રેનના રાષ્ટ્રપતિ ઝેલેન્સ્કી સાથે ઘણા યુરોપિયન નેતાઓ ભાગ લેશે.

ટ્રમ્પ સાથે વિવાદ બાદ ઝેલેન્સ્કી એલર્ટ !

ટ્રમ્પ સાથે બેઠક યોજાય તે પહેલા ઝેલેન્સ્કી એલર્ટ થઈ ગયા છે, તેથી જ તેઓ યુરોપિયન નેતાઓને સાથે રાખીને ટ્રમ્પ સાથે બેઠક યોજવાના છે. અગાઉ ફેબ્રુઆરીમાં અમેરિકા પહોંચેલા ઝેલેન્સ્કી (Ukraine President Volodymyr Zelenskyy) અને ટ્રમ્પ (US President Donald Trump) વચ્ચે બોલાચાલી થઈ હતી. ટ્રમ્પે યુક્રેનનો ઘણો દબાવવાનો પ્રયાસ કર્યો હતો. ત્યારે આ જ કારણે ઝેલેન્સ્કી યુરોપિયન નેતાઓને સાથે રાખી ફરી ટ્રમ્પ સાથે બેઠક કરવાની યોજના ધરાવતા હોઈ શકે છે. હવે યુરોપિયન નેતાઓની હાજરીથી આશા છે કે યુક્રેન પર કોઈપણ પ્રકારનું દબાણ ન આવે અને શાંતિ સમજૂતીની દિશામાં પારદર્શિતા જળવાઈ રહે.

આ પણ જુઓ : VIDEO : યુક્રેને ફરી આપ્યો રશિયાને ઝટકો, એક જ ઝાટકે ઉડાવી નાખ્યું ‘રશિયન તોપખાનું’

ક્યાંક યુક્રેનના હિતોને નુકસાનનો ડર

ટ્રમ્પ પહેલેથી જ કહેતા રહ્યા છે કે, તેઓ રશિયા સાથે શાંતિ સમજૂતીની મધ્યસ્થી કરવા માંગે છે. જોકે, યુરોપિયન દેશોને આશંકા છે કે, આ પ્રક્રિયામાં ક્યાંક યુક્રેનના હિતોને નુકસાન ન થાય. તેમને ડર છે કે અમેરિકા પોતાના હિતોને પ્રાથમિકતા આપીને એવી કોઈ ડીલ ન કરી બેસે, જે યુક્રેનની સાર્વભૌમત્વ અને પ્રાદેશિક અખંડિતતા માટે જોખમ ઊભું કરે. આ જ કારણ છે કે, યુરોપના મોટા નેતાઓ પોતે આ વાતચીતમાં ભાગ લઈ રહ્યા છે.

ઝેલેન્સ્કી સાથે આ નેતાઓ પણ પહોંચશે અમેરિકા

આ બેઠકમાં યુરોપિયન કમિશનના પ્રમુખ ઉર્સુલા વોન ડેર લેયેન, ફ્રાન્સના રાષ્ટ્રપતિ ઈમેન્યુઅલ મેક્રોન (France President Emmanuel Macron), જર્મનીના ચાન્સેલર ફ્રેડરિક મર્ઝ અને નાટોના મહાસચિવ માર્ક રુટ પણ સામેલ થશે. આટલી મોટી સંખ્યામાં યુરોપિયન નેતાઓનું વ્હાઇટ હાઉસ પહોંચવું એ વાત દર્શાવે છે કે, યુરોપ યુક્રેન મુદ્દે કોઈપણ સમજૂતીમાં પોતાની મહત્વપૂર્ણ ભૂમિકા જાળવી રાખવા માંગે છે. તાજેતરમાં ટ્રમ્પે પુતિન સાથે બેઠક કરી હતી, જેમાં ઝેલેન્સ્કીને આમંત્રણ આપવામાં આવ્યું ન હતું. આ ઘટનાએ યુક્રેન અને યુરોપ બંનેની ચિંતામાં વધારો કર્યો છે કે, ક્યાંક અમેરિકા એકપક્ષીય નિર્ણય લેવાનો પ્રયાસ ન કરે.

આ પણ જુઓ : VIDEO : વોશિંગ્ટન ડીસીમાં સ્થિતિ બેકાબૂ, ટ્રમ્પ તંત્રએ ત્રણ રાજ્યોમાંથી 700 સૈનિકો બોલાવ્યા