ટ્રમ્પની ઈરાનને ચેતવણી, 'પ્રોજેક્ટ ફ્રીડમ પ્લસ' તૈયાર; આજે રાત્રે આવનારા એક પત્ર પર દુનિયાની નજર!

Trump Warns Iran with Project Freedom Plus: અમેરિકા અને ઈઝરાયલ સાથેના તણાવ વચ્ચે અમેરિકન પ્રમુખ ડોનાલ્ડ ટ્રમ્પે ઈરાન સાથેની પરમાણુ મંત્રણા અંગે મહત્ત્વનું નિવેદન આપ્યું છે. ટ્રમ્પે જણાવ્યું કે તેમને આજે રાત સુધીમાં ઈરાન તરફથી એક પત્ર મળવાની આશા છે, જેનાથી આગળની સ્થિતિ સ્પષ્ટ થશે. મંત્રણામાં થઈ રહેલા વિલંબ અંગે તેમણે કહ્યું કે, ઈરાન જાણીજોઈને પ્રક્રિયા ધીમી કરી રહ્યું છે કે કેમ તેની સાચી જાણકારી ટૂંક સમયમાં મળી જશે.

ટ્રમ્પે વધુમાં ઈરાનને કડક ચેતવણી આપતાં કહ્યું કે, જો આ વાતચીત સફળ નહીં થાય તો અમેરિકા વધુ કડક વલણ અપનાવશે. તેમણે સંકેત આપ્યો કે જરૂર પડશે તો તેઓ 'પ્રોજેક્ટ ફ્રીડમ' વ્યૂહનીતિ પર પાછા ફરી શકે છે. જોકે, આ વખતે તે 'પ્રોજેક્ટ ફ્રીડમ પ્લસ' હશે, જેમાં અગાઉ કરતાં પણ વધુ આકરા પગલાં અને નવી રણનીતિઓનો સમાવેશ કરવામાં આવશે જેથી અમેરિકાના હિતોનું રક્ષણ થઈ શકે.

રશિયા-યુક્રેન યુદ્ધ અને સીઝફાયર પર ટ્રમ્પનું નિવેદન

રશિયા અને યુક્રેન વચ્ચે ચાલી રહેલા યુદ્ધ અંગે ચિંતા વ્યક્ત કરતાં ટ્રમ્પે તેને બીજા વિશ્વ યુદ્ધ પછીની સૌથી મોટી અને દુ:ખદ ઘટના ગણાવી હતી. અત્યારે બંને દેશો વચ્ચે થોડા સમય માટે જે યુદ્ધવિરામ (સીઝફાયર) થયો છે તેનાથી તેમણે સંતોષ વ્યક્ત કર્યો હતો અને એવી આશા વ્યક્ત કરી હતી કે આ શાંતિનો સમય હજુ પણ આગળ વધી શકે છે.

જ્યારે તેમને પૂછવામાં આવ્યું કે શું આ યુદ્ધવિરામ ત્રણ દિવસથી વધુ ચાલી શકે? ત્યારે તેમણે હકારાત્મક જવાબ આપતાં કહ્યું કે, 'જો આ વિરામ લાંબો સમય ચાલે તો તે ખૂબ જ સારી બાબત ગણાશે. હું ખરેખર ઇચ્છું છું કે હવે આ ભયાનક લડાઈનો અંત આવે અને શાંતિ સ્થપાય.'

અર્થતંત્ર અને પબ્લિક હેલ્થ મુદ્દે આશાવાદ

અમેરિકાની આંતરિક સ્થિતિ અંગે વાત કરતા ટ્રમ્પે દેશના અર્થતંત્ર અને રોજગારીના મોરચે ભારે ઉત્સાહ વ્યક્ત કર્યો હતો. તેમણે જણાવ્યું કે હાલમાં અમેરિકામાં રોજગારીના આંકડા ખૂબ જ મજબૂત છે અને ઇતિહાસમાં ક્યારેય ન હોય એટલી મોટી સંખ્યામાં લોકો અત્યારે કામ કરી રહ્યા છે, જે દેશની આર્થિક પ્રગતિના સંકેત આપે છે.

બીજી તરફ, જાહેર આરોગ્યના મુદ્દે તેમણે હેન્ટાવાઇરસ  (Hantavirus) અંગે ફેલાયેલી ચિંતાઓને દૂર કરવાનો પ્રયાસ કર્યો હતો. તેમણે નાગરિકોને આશ્વાસન આપતા કહ્યું કે આરોગ્ય વિભાગ આ વાઇરસ પર સતત નજર રાખી રહ્યું છે. ટ્રમ્પે સ્પષ્ટતા કરી હતી કે આ વાઇરસ કોવિડની જેમ ઝડપથી એકબીજામાં ફેલાતો નથી, તેથી ગભરાવાની જરૂર નથી અને હાલમાં બધી જ પરિસ્થિતિ સંપૂર્ણપણે નિયંત્રણમાં છે.

આ પણ વાંચો: યુદ્ધવિરામ-શાંતિમંત્રણા વચ્ચે અમેરિકા અને ઇરાનના એકબીજા પર હુમલા

આંતરરાષ્ટ્રીય સંબંધો અને અન્ય ગતિવિધિઓ

આંતરરાષ્ટ્રીય સ્તરે ટ્રમ્પે બ્રાઝિલના રાષ્ટ્રપતિ લુઇઝ ઇનાસિયો લુલા ડા સિલ્વા સાથેની મુલાકાતને ખૂબ જ સફળ ગણાવી હતી. જોકે, આ બેઠક વિશે વધુ વિગતો જાહેર કરવાનું તેમણે ટાળ્યું હતું. આ ઉપરાંત, યુનાઇટેડ કિંગડમમાં ચાલી રહેલી રાજકીય હિલચાલ અંગે તેમણે કોઈ ટિપ્પણી કરવાનો ઇન્કાર કરતાં માત્ર એટલું જ કહ્યું હતું કે, તેઓ હાલમાં પોતાની સરકારની કામગીરી અને સિદ્ધિઓથી સંતુષ્ટ છે.