'હિઝબુલ્લાહને રોકો નહીંતર તબાહી મચાવી દઈશું', સ્વિટ્ઝર્લેન્ડમાં શાંતિ મંત્રણા વચ્ચે ટ્રમ્પની ઈરાનને ધમકી

Trump Warns Iran Of Direct Attack : અમેરિકન પ્રમુખ ડોનાલ્ડ ટ્રમ્પે ફરી એકવાર ઈરાન પર સૈન્ય હુમલો કરવાની ધમકી આપી છે. ટ્રમ્પે હિઝબુલ્લાહ તરફ ઈશારો કરતા કહ્યું છે કે, 'ઈરાને લેબનોનમાં પોતાના પ્રોક્સી (પગારદાર સંગઠન) પર કાબૂ મેળવવો પડશે. જો ઈરાન આવું નહીં કરે તો, અમેરિકા તેના પર ખૂબ જ ભીષણ હુમલો કરશે.' ટ્રમ્પની આ ધમકી એવા સમયે આવી છે, જ્યારે સ્વિટ્ઝર્લેન્ડમાં અમેરિકા અને ઈરાનના પ્રતિનિધિમંડળ (ડેલિગેશન) શાંતિ વાર્તા કરી રહ્યા છે. અમેરિકાના પ્રમુખ ડોનાલ્ડ ટ્રમ્પની આ ધમકી ચાલુ વાતચીત દરમિયાન આવી છે.

ડોનાલ્ડ ટ્રમ્પે ગયા અઠવાડિયે અમેરિકા દ્વારા ઈરાન પર કરવામાં આવેલા હુમલાનો ઉલ્લેખ કરીને રવિવારે સાંજે સોશિયલ મીડિયા પર એક પોસ્ટ કરી છે. આ પોસ્ટમાં ટ્રમ્પે કહ્યું કે, 'જો ઈરાન લેબનોનમાં પોતાના પ્રોક્સી (હિઝબુલ્લાહ)ને મુશ્કેલીઓ ઊભી કરતો નહીં રોકે, તો તેણે ગયા અઠવાડિયા જેવા જ અથવા તેનાથી પણ વધુ જોરદાર સૈન્ય હુમલાનો સામનો કરવો પડી શકે છે.'

ઈરાન-અમેરિકા MoUમાં લેબનોન

અમેરિકા અને ઈરાન વચ્ચે થયેલા સમજૂતી પત્ર (MoU)માં લેબનોનને પણ સામેલ કરવામાં આવ્યું છે. લેબનોનના મોટા ભાગ પર નિયંત્રણ ધરાવતા જૂથ હિઝબુલ્લાહ સાથે ઈઝરાયલની લાંબા સમયથી લડાઈ ચાલી રહી છે. હિઝબુલ્લાહને હંમેશા ઈરાનનું સમર્થન મળતું રહ્યું છે. આવી સ્થિતિમાં ઈરાને આ સમજૂતીમાં લેબનોનમાં સીઝફાયર (યુદ્ધવિરામ)નો સમાવેશ કરાવ્યો છે. આ સમજૂતી છતાં ઈઝરાયલે લેબનોનમાં હુમલા ચાલુ રાખ્યા છે. જેનાથી ઈરાને રોષે ભરાઈને હોર્મુઝની સમુદ્રધુની (Strait of Hormuz) ફરીથી બંધ કરવાની વાત કહી છે. લેબનોન પરના હુમલાઓને લઈને ડોનાલ્ડ ટ્રમ્પે અગાઉ ઈઝરાયલના પીએમ બેન્જામિન નેતન્યાહૂના વલણ સામે નારાજગી વ્યક્ત કરી હતી. જોકે, રવિવારે ડોનાલ્ડ ટ્રમ્પે પોતાનું વલણ બદલતા ઈરાન પર હુમલાની ધમકી આપી દીધી છે.

આ પણ વાંચો : હોર્મુઝ વિવાદ બાદ ભારતે બદલી રણનીતિ! અમેરિકા પાસેથી ઘટાડી ખરીદી, રશિયામાં પાસેથી કર્યું રેકોર્ડ આયાત

ઈઝરાયલને છૂટ આપશે ટ્રમ્પ?

ઈઝરાયલે વારંવાર કહ્યું છે કે, 'લેબનોનના જૂથ હિઝબુલ્લાહથી તેની સુરક્ષાને મોટો ખતરો છે. આવી સ્થિતિમાં અમેરિકા-ઈરાનની સમજૂતીમાં લેબનોનને સામેલ ન કરવું જોઈએ. અમેરિકાએ અત્યાર સુધી આ દલીલ સ્વીકારી નહોતી અને સમગ્ર પશ્ચિમ એશિયા (મિડિલ ઈસ્ટ)માં શાંતિ પર ભાર મૂક્યો હતો. પરંતુ રવિવારે ટ્રમ્પની આ પોસ્ટ પરથી એવું લાગે છે કે, તેઓ હવે હિઝબુલ્લાહને મોટો ખતરો ગણાવતી ઈઝરાયલની વાત સાથે સહમત થઈ રહ્યા છે.