અમેરિકામાં ભણીને નોકરી કરવા માગતા વિદેશી વિદ્યાર્થીઓ પર 1 લાખ ડૉલર ફી લાદવાની તૈયારી

Donald Trump and Students news : અમેરિકામાં ઉચ્ચ શિક્ષણ મેળવતા વિદેશી વિદ્યાર્થીઓ માટે ટ્રમ્પ સરકાર એક મોટો આંચકો આપવાની તૈયારી કરી રહી છે. નવા પ્રસ્તાવ મુજબ, યુએસ યુનિવર્સિટીઓમાંથી અભ્યાસ પૂર્ણ કર્યા પછી ત્યાં નોકરી કરવાની પરવાનગી મેળવવા માટે વિદેશી વિદ્યાર્થીઓએ 1 લાખ ડોલર (લગભગ ₹83 લાખ) ફી તરીકે ચૂકવવા પડી શકે છે.

OPT પ્રોગ્રામ પર લાગશે ભારે ફી

અમેરિકાની સરકાર આ ફી 'ઓપ્શનલ પ્રેક્ટિકલ ટ્રેનિંગ' (OPT) પ્રોગ્રામ હેઠળ લાગુ કરવા જઈ રહી છે. આ સિસ્ટમ આંતરરાષ્ટ્રીય વિદ્યાર્થીઓને તેમના સ્ટુડન્ટ વિઝા પર ગ્રેજ્યુએશન પૂરું કર્યા પછી 1 થી 3 વર્ષ સુધી અમેરિકામાં કામ કરવાની મંજૂરી આપે છે. વર્ષ 2024 ના આંકડા મુજબ, લગભગ 4,19,000 વિદેશી વિદ્યાર્થીઓ આ પ્રોગ્રામ હેઠળ યુએસમાં કામ કરી રહ્યા હતા.

IT કંપનીઓ અને યુનિવર્સિટીઓ પર પડશે માઠી અસર

ટ્રમ્પ સરકારના આ નિર્ણયથી વિદેશી વિદ્યાર્થીઓનો અમેરિકા જવાનો ક્રેઝ ઘટી શકે છે. આ પગલાની સીધી અસર યુએસ યુનિવર્સિટીઓની નાણાકીય સ્થિતિ પર પડશે, જે વિદેશી વિદ્યાર્થીઓની ફી પર નિર્ભર છે. આ ઉપરાંત સિલિકોન વેલી અને વોલ સ્ટ્રીટની ટેકનોલોજી અને ફાયનાન્સ કંપનીઓને ટેકનિકલ હોદ્દા માટે યોગ્ય ટેલેન્ટ શોધવામાં ભારે મુશ્કેલી પડશે.

H-1B વિઝા વિવાદ બાદ નવું પગલું

અગાઉ ટ્રમ્પ સરકારે H-1B વિઝા પર $1 લાખની લેવી લગાવવાનો પ્રયાસ કર્યો હતો, પરંતુ બોસ્ટનની અદાલતે તેના પર રોક લગાવી દીધી હતી. હવે OPT પર આ ફી લાદીને સરકાર તે જ લક્ષ્ય હાસિલ કરવા માંગે છે. ડિપાર્ટમેન્ટ ઓફ હોમલેન્ડ સિક્યુરિટી (DHS) માં આ અંગે હજુ ચર્ચા ચાલી રહી છે અને વ્હાઈટ હાઉસની અંતિમ મંજૂરી મળવાની બાકી છે. આ ફી વિદ્યાર્થીઓ પોતે ભરશે કે તેમને નોકરી આપનાર કંપનીઓ, તે હજુ નક્કી થયું નથી.