મિડલ ઈસ્ટમાં યુદ્ધવિરામના કોઈ સંકેત નહીં, વાતચીત પણ ઠપ, અમેરિકાના ઈરાન પર સતત 11મી રાતે હુમલા

Iran and USA War Updates : અમેરિકાની સેનાએ બુધવારે ઈરાનના અનેક વિસ્તારો પર સતત 11મી રાત્રે ભીષણ હવાઈ હુમલા કર્યા છે. આ સાથે જ પાકિસ્તાન દ્વારા મધ્યસ્થતા કરીને હાથ ધરાયેલા કૂટનીતિક પ્રયાસો અને સીઝફાયર (યુદ્ધવિરામ) ની તમામ આશાઓ પર પાણી ફરી વળ્યું છે. અમેરિકન પ્રમુખ ડોનાલ્ડ ટ્રમ્પે હુમલા વધુ તીવ્ર બનાવવાના સંકેત આપતા સ્પષ્ટ કર્યું છે કે ઈરાની અધિકારીઓ સાથે અત્યારે કોઈ બેઠક કરવાની અમેરિકાની ઈચ્છા નથી.

પરમાણુ પ્લાન્ટ પર હુમલાની ધમકી અને ઈરાનનો પલટવાર

ડોનાલ્ડ ટ્રમ્પે ચેતવણી આપી છે કે યુએસ સેના ટૂંક સમયમાં ઈરાનના મુખ્ય પરમાણુ સંવર્ધન કેન્દ્ર નજીક આવેલા 'પિકેક્સ માઉન્ટેન' જેવા ભૂગર્ભ સૈન્ય કિલ્લાને નિશાન બનાવશે. આ ધમકીના જવાબમાં ઈરાનના 'ખાતમ અલ-અંબિયા' સેન્ટ્રલ હેડક્વાર્ટર દ્વારા કડક ચેતવણી આપવામાં આવી છે કે જો અમેરિકા પરમાણુ કે સંવેદનશીલ મથકો પર હુમલો કરશે તો તેને સમગ્ર ક્ષેત્રમાં યુદ્ધનો વિસ્તાર ગણવામાં આવશે અને અમેરિકા તથા તેના સાથી દેશોના તમામ હિતો પર જવાબી હુમલા કરાશે.

હોર્મુઝમાં ટેન્કર પર હુમલો, ક્રૂડ $91 ને પાર

વૈશ્વિક તેલ પુરવઠા માટે અત્યંત મહત્વપૂર્ણ એવા હોર્મુઝ સ્ટ્રેટ (Hormuz Strait) પર ઈરાને મંગળવારે વધુ એક ઓઈલ ટેન્કરને નિશાન બનાવ્યું હતું, જેના કારણે ક્રૂને જહાજ છોડીને ભાગવું પડ્યું હતું. આ સંઘર્ષના કારણે આંતરરાષ્ટ્રીય બજારમાં કાચા તેલ (Crude Oil) ની કિંમત પ્રતિ બેરલ 91 ડોલરને પાર પહોંચી ગઈ છે. બીજી તરફ યમનના હુતી વિદ્રોહીઓએ સાઉદી અરેબિયાની નૌકાદળ નાકાબંધીની જાહેરાત કરીને રેડ સી (લાલ સમુદ્ર) માં નવો મોરચો ખોલી દીધો છે.

કુવૈત, જોર્ડન અને બહેરીનમાં મિસાઈલ એટેક

ઈરાને અખાતી પ્રદેશમાં આવેલા અમેરિકન સાથી દેશો પર પણ હુમલા તેજ કર્યા છે. કુવૈતમાં ઈરાને સતત ચોથા દિવસે વીજળી અને પાણી શુદ્ધિકરણના પ્લાન્ટ પર હુમલો કર્યો છે, જેનાથી ત્યાં પીવાના પાણીનું ગંભીર સંકટ સર્જાયું છે. જોર્ડને 5 ડ્રોન અને 3 મિસાઈલ હવામાં જ તોડી પાડ્યા હતા, જ્યારે બહેરીનમાં સાયરનના અવાજો ગૂંજી ઉઠ્યા હતા. યુએસ સેન્ટ્રલ કમાન્ડ (CENTCOM) મુજબ, યુદ્ધમાં ઘાયલ થયેલા અમેરિકન સૈનિકોની સંખ્યા 500 ને વટાવી ગઈ છે.