સાઉદી અરામકો રિફાઇનરી પર મિસાઇલ-ડ્રોનથી હુમલો: રિયાધમાં ભયાનક આગ, આકાશમાં ધુમાડાના ગોટેગોટા!

Massive Fire At Aramco Facility In Riyadh Houthi Missile Drone Strike Claim | વિશ્વના સૌથી મોટા ઓઇલ ઉત્પાદક દેશ સાઉદી અરેબિયાના હૃદય સમાન રાજધાની રિયાધમાં શનિવારે સરકારી ઓઇલ કંપની સાઉદી અરામકોની ફેસિલિટીમાંથી આગની વિકરાળ જ્વાળાઓ અને કાળા ડિબાંગ ધુમાડાના તોતિંગ ગોટેગોટા આકાશ તરફ ઊડતા જોવા મળ્યા હતા.

અમે મિસાઈલથી સાઉદી અરેબિયામાં હુમલો કર્યો: હુથી

આ ભીષણ આગ બાદ યમનના ઈરાન-સમર્થિત હુથી વિદ્રોહીઓએ દાવો કર્યો છે કે તેમણે સાઉદી રાજધાનીમાં આવેલા આ ઓઇલ પ્લાન્ટ પર બેલિસ્ટિક મિસાઇલો અને આત્મઘાતી ડ્રોન વડે ભીષણ સૈન્ય હુમલો કર્યો છે. જે બાદ વૈશ્વિક ઊર્જા બજાર અને ક્રૂડ ઓઇલ સપ્લાય ચેઇનમાં ભારે ગભરાટ ફેલાઈ ગયો છે.

રિયાધની અરામકો રિફાઇનરીમાં આગ: સ્થળ પર એમ્બ્યુલન્સ અને પોલીસનો કાફલો

શનિવારે બનેલી આ ઘટના બાદ સાઉદી અરેબિયા દ્વારા હજુ સુધી પ્લાન્ટ પર સીધો હુમલો થયો છે કે કેમ તેની કોઈ સત્તાવાર પુષ્ટિ કરવામાં આવી નથી. જોકે, આંતરરાષ્ટ્રીય ન્યૂઝ એજન્સી AFPના અહેવાલ અનુસાર રિફાઇનરીમાં લાગેલી ભયાનક આગ પર કાબૂ મેળવવા માટે ફાયર ફાઇટર્સ અને ફાયર એન્જિનો સતત પ્રયાસ કરી રહ્યા હતા. પ્લાન્ટની આસપાસ મોટી સંખ્યામાં એમ્બ્યુલન્સ અને પોલીસના વાહનો ખડકી દેવામાં આવ્યા હતા અને સમગ્ર વિસ્તારને કોર્ડન કરી લેવામાં આવ્યો હતો.

સોશિયલ મીડિયા પર આગના વીડિયો વાયરલ

આ કથિત હુમલા બાદ સોશિયલ મીડિયા પ્લેટફોર્મ્સ પર અરામકો ફેસિલિટીના અનેક વીડિયો ઝડપથી વાયરલ થઈ રહ્યા છે. આ ફૂટેજમાં સ્પષ્ટ જોઈ શકાય છે કે પ્લાન્ટ પરિસરની અંદરથી ઓછામાં ઓછા બે અલગ-અલગ મુખ્ય પોઈન્ટ્સ પરથી પ્રચંડ જ્વાળાઓ ભભૂકી રહી છે અને કાળો ગાઢ ધુમાડો આકાશમાં ફેલાઈ રહ્યો છે. જેમ જેમ સમય વીતતો ગયો તેમ આગ વધુ વિકરાળ બનતી દેખાતી હતી. જોકે, આ વીડિયોની સ્વતંત્ર રીતે પુષ્ટિ થઈ શકી નથી.

હુથી લશ્કરી પ્રવક્તા યાહ્યા સરીનો મોટો દાવો

શનિવારે મોડી રાત્રે યમનના હુથી વિદ્રોહી જૂથના સૈન્ય પ્રવક્તા યાહ્યા સરીએ કહ્યું કે, હુથી જૂથે રિયાધમાં આવેલી અરામકોની ઓઇલ ફેસિલિટીને બેલિસ્ટિક મિસાઇલો અને સશસ્ત્ર ડ્રોન દ્વારા નિશાન બનાવી છે અને અમારા આ સફળ હુમલાને પરિણામે લક્ષિત સ્થળો પર ભીષણ આગ ભડકી ઊઠી છે.

સના પર કરાયેલા બોમ્બમારાનો બદલો લીધો: હુથી

હુથી વિદ્રોહીઓ તરફથી અરામકો પર કરવામાં આવેલો આ હુમલો અચાનક નથી થયો, પરંતુ તે બંને પક્ષો વચ્ચે સતત વકરી રહેલા લોહિયાળ સંઘર્ષનું પરિણામ છે. હુથીઓએ જણાવ્યું હતું કે સાઉદી અરેબિયાએ ગુરુવારે રાત્રે યમનની રાજધાની સના પર ભીષણ બોમ્બમારો કર્યો હતો. જુલાઈ મહિનામાં બંને પક્ષો વચ્ચે યુદ્ધ ફરી શરૂ થયા પછી યમનની રાજધાની પર આ પ્રકારનો આ પહેલો મોટો હવાઈ હુમલો હતો.

હુથી-સંચાલિત અલ-મસીરા ટીવીએ અહેવાલ આપ્યો હતો કે સાઉદી વિમાનોએ સના પર 26 વખત બોમ્બમારો કર્યો હતો, જેને તેમણે "સાઉદી આક્રમણ" ગણાવ્યું હતું. અલ-મસીરા ચેનલના જણાવ્યા મુજબ, હુથીઓના ગઢ ગણાતા ઉત્તર-પશ્ચિમ યમનના સાદા પ્રાંતમાં પણ ટેલિકોમ્યુનિકેશન નેટવર્ક પર મિસાઇલ હુમલા કરવામાં આવ્યા હતા. આ હુમલાઓના બદલા તરીકે હુથીઓએ હવે સીધું સાઉદી અરેબિયાના ઓઇલ ઈન્ફ્રાસ્ટ્રક્ચરને ટાર્ગેટ કરવાનું શરૂ કર્યું છે.

અગાઉ યાન્બુમાં પણ કરાયો હતો હુમલાનો પ્રયાસ

હુથી જૂથ છેલ્લા કેટલાક સમયથી સાઉદી શહેરો અને એનર્જી ઇન્ફ્રાસ્ટ્રક્ચર પર હુમલાઓ સતત વધારી રહ્યું છે. ગત સપ્તાહે પણ હુથી વિદ્રોહીઓએ યાન્બુ ખાતે આવેલી અરામકો ફેસિલિટીઝ પર મિસાઇલો અને ડ્રોન વડે હુમલો કરવાનો દાવો કર્યો હતો. તે સમયે સાઉદી અરેબિયાની સેનાએ જણાવ્યું હતું કે તેમણે તાઈફ અને યાન્બુ વિસ્તાર તરફ છોડવામાં આવેલી 6 બેલિસ્ટિક મિસાઇલોને હવામાં જ તોડી પાડી હતી અને અરામકોને કોઈ નુકસાન થયું નહોતું.

પરંતુ આ વખતે રિયાધ પ્લાન્ટમાં ખુદ ન્યૂઝ એજન્સીઓના પત્રકારોએ આગની જ્વાળાઓ અને ધુમાડો પ્રત્યક્ષ જોયો હોવાથી આ ઘટના ખૂબ જ ગંભીર માનવામાં આવી રહી છે.