ત્રણ વર્ષ પહેલાં મહિલાઓનું અપહરણ કરનાર લત્ફી સકર ઠાર, ઈઝરાયલ પર થયેલા આતંકી હુમલામાં હતો સામેલ

Israel Eliminates Terrorist Saher Sakr: ઈઝરાયલી સેના (IDF) અને શિન બેટ (Shin Bet) એ શનિવારે ગાઝા પટ્ટીમાં એક હવાઈ હુમલાની જાહેરાત કરી હતી. મધ્ય ગાઝાના નુસેરાત વિસ્તારમાં થયેલા આ હુમલામાં સહેર નિદાલ લત્ફી સકર માર્યો ગયો છે. ઈઝરાયલી સંરક્ષણ દળોનું કહેવું છે કે, સકર જેહાદી સંગઠનો સાથે જોડાયેલો હતો અને 7 ઓક્ટોબર 2023ના રોજ ઈઝરાયલ પર થયેલા આતંકી હુમલામાં સામેલ હતો. સેનાના જણાવ્યા અનુસાર, સકરે નોઆ અર્ગમની અને અવિનતન ઓરનું અપહરણ કર્યુ હતુ. આ બંનેનું નોવા મ્યૂઝિક ફેસ્ટિવલમાંથી અપહરણ કરવામાં આવ્યું હતું. અપહરણના ફૂટેજમાં સ્પષ્ટપણે જોઈ શકાય છે કે, સકર, નોઆ અર્ગમનીને મોટરસાયકલ પર બેસાડીને ગાઝા પટ્ટી તરફ લઈ જતો હતો.

હમાસને હથિયાર પહોંચાડતો હતો સકર

ઈઝરાયલી સેનાના નિવેદન મુજબ, સકર યુદ્ધ દરમિયાન હમાસને હથિયારો પહોંચાડવામાં સામેલ હતો. થોડા દિવસોમાં તે સૈનિકો અને ઈઝરાયલી નાગરિકો પર હુમલો કરવાની તૈયારી કરી રહ્યો હતો. સેનાએ કહ્યું કે, તે હમાસ અને ઈસ્લામિક જેહાદના સૈન્ય વિંગના આતંકવાદીઓ સાથે મળીને કામ કરી રહ્યો હતો, અને યુદ્ધવિરામ કરારનો ભંગ કરી રહ્યો હતો. ઈઝરાયલી સેનાએ જણાવ્યું કે, આ ખતરાને ખતમ કરવા માટે જ તેને નિશાન બનાવવામાં આવ્યો હતો. આ હુમલો ઈઝરાયલ પોલીસની વિશેષ ગિદઓનીમ યુનિટ 33 (Gideonim Unit 33) દ્વારા અંજામ આપવામાં આવ્યો હતો.

વર્ષ 2023માં અનેક હુમલા થયા હતા

7 ઓક્ટોબર 2023ના રોજ હમાસના નેતૃત્વમાં અનેક હુમલા થયા હતા, જેમાં નોવા ફેસ્ટિવલ સૌથી વધુ પ્રભાવિત સ્થળોમાંથી એક હતું. નુસેરાત એ મધ્ય ગાઝાનો વિસ્તાર છે, જ્યાં આ હુમલો કરવામાં આવ્યો હતો. સકરના કિસ્સામાં તેના અપહરણના વીડિયો ફૂટેજને પુરાવા તરીકે રજૂ કરવામાં આવ્યા હતા. નોઆ અર્ગમનીની મુક્તિ બાદમાં થઈ હતી, પરંતુ તે દિવસની ઘટનાઓ આજે પણ ચર્ચામાં રહે છે. ઈઝરાયલી સેના અને શિન બેટના જણાવ્યા અનુસાર સહેર નિદાલ સકર એક મોટો ખતરો હોવાથી તેને ટાર્ગેટ કરવામાં આવ્યો હતો, અને નુસેરાતમાં થયેલા હુમલામાં તેના મોતની પુષ્ટિ કરવામાં આવી છે.