Israel-Lebanon Ceasefire Agreement Reached | લાંબા સમયથી ચાલી રહેલા સૈન્ય તણાવ અને હિંસા બાદ આખરે ઈઝરાયલ અને લેબેનોન વચ્ચે યુદ્ધવિરામ (સીઝફાયર)ના નવીનીકરણ પર સહમતિ સદાઈ છે. અમેરિકાની મધ્યસ્થતામાં યોજાયેલી ચોથા રાઉન્ડની બેઠક બાદ બંને દેશો આ મહત્વપૂર્ણ શાંતિ સમજૂતી પર પહોંચ્યા છે. આ કરાર હેઠળ લેબેનોનમાં કેટલાક ખાસ પ્રાયોગિક સુરક્ષા વિસ્તારો (Experimental Security Zones) બનાવવામાં આવશે, જેમાંથી હિઝબુલ્લાહના લડવૈયાઓને સંપૂર્ણપણે બહાર રાખવામાં આવશે.
સીઝફાયરની મુખ્ય શરતો
ગોળીબાર પર સંપૂર્ણ રોક: હિઝબુલ્લાહ દ્વારા ઈઝરાયલ તરફ કરવામાં આવતા તમામ પ્રકારના રોકેટ અને સૈન્ય હુમલાઓ તત્કાલ બંધ કરવા પડશે.
હથિયારો અને લડવૈયાઓની વાપસી: લિટની નદી (Litani River) ની દક્ષિણ દિશામાં આવેલા તમામ સરહદી વિસ્તારોમાંથી હિઝબુલ્લાહના લડવૈયાઓ અને તેમના હથિયારોને સંપૂર્ણપણે હટાવી લેવામાં આવશે.
લેબેનોની સેનાનું નિયંત્રણ: સુરક્ષા જાહેર કરાયેલા આ તમામ વિસ્તારો પર લેબેનોનની સત્તાવાર સેના (Lebanese Army) પૂર્ણ નિયંત્રણ મેળવશે અને સુરક્ષા સુનિશ્ચિત કરશે.
પ્રતિબંધો: આ વિસ્તારોમાં હિઝબુલ્લાહની કોઈપણ પ્રકારની સૈન્ય કે શંકાસ્પદ પ્રવૃત્તિઓ પર કડક પ્રતિબંધ રહેશે.
વાર્તાલાપમાં હિઝબુલ્લાહ ગેરહાજર, ઈરાનને સ્પષ્ટ સંદેશ
અમેરિકાના વિદેશ મંત્રાલયમાં યોજાયેલી આ ઉચ્ચ સ્તરીય બેઠક બાદ જારી કરાયેલા સંયુક્ત નિવેદનમાં સ્પષ્ટ કરવામાં આવ્યું છે કે, ઈઝરાયલ અને લેબેનોન વચ્ચેના ભવિષ્યના સંબંધો બંને દેશોની સાર્વભૌમ સરકારો જ નક્કી કરશે. લેબેનોનના ભવિષ્યને પ્રભાવિત કરવાના કોઈપણ બાહ્ય દેશ કે સંગઠનના પ્રયાસોને સહન કરવામાં નહીં આવે. આ નિવેદનને સીધું જ હિઝબુલ્લાહના કટ્ટર સમર્થક એવા ઈરાન તરફના સ્પષ્ટ ઈશારા તરીકે જોવામાં આવી રહ્યું છે. ખાસ વાત એ છે કે આ શાંતિ વાર્તાલાપમાં હિઝબુલ્લાહ પોતે સીધી રીતે સામેલ નહોતું.
શાંતિની દિશામાં મોટું પગલું પણ પડકારો યથાવત
આ સુરક્ષા વિસ્તારોને જમીન પર કેવી રીતે લાગુ કરવામાં આવશે તેની વિગતવાર યોજના હજુ જાહેર કરવામાં આવી નથી. જોકે, અમેરિકાના પ્રયાસોથી થયેલી આ સમજૂતીને મિડલ ઈસ્ટમાં છેલ્લા કેટલાક મહિનાઓથી ચાલી રહેલા તણાવને ઓછો કરવા માટે એક ઐતિહાસિક પ્રગતિ માનવામાં આવી રહી છે. પ્રાદેશિક નિષ્ણાતોનું કહેવું છે કે આ સમજૂતી કાગળ પર જેટલી મજબૂત દેખાય છે, તેની સફળતાનો ખરો આધાર આગામી દિવસોમાં હિઝબુલ્લાહ અને ઈરાનના વાસ્તવિક વલણ પર રહેશે.
