Israel Captures Strategic Beaufort Castle : દક્ષિણ લેબેનોનમાં ઈઝરાયલ અને હિઝબુલ્લાહ વચ્ચે ચાલી રહેલા સંઘર્ષમાં એક મોટો વળાંક આવ્યો છે. ઈઝરાયલી સૈનિકોએ દક્ષિણ લેબેનોનમાં પહાડની ટોચ પર આવેલા 'બ્યુફોર્ટ કેસલ' (Beaufort castle) પર કબજો જમાવ્યો છે. આ ઈઝરાયલની છેલ્લા 26 વર્ષમાં લેબેનોન સરહદની અંદરની સૌથી મોટી ઘૂસણખોરી માનવામાં આવે છે.
શું છે બ્યુફોર્ટ કેસલનું મહત્ત્વ?
ક્રુસેડર યુગમાં નિર્મિત આ કિલ્લો દક્ષિણ લેબેનોનમાં ખૂબ જ વ્યૂહાત્મક મહત્ત્વ ધરાવે છે. ઈઝરાયલના સંરક્ષણ મંત્રી ઈઝરાયલ કાત્ઝે સોશિયલ મીડિયા પર પુષ્ટિ કરી છે કે આ કિલ્લા પર ઈઝરાયલનો ધ્વજ લહેરાવવામાં આવ્યો છે.
નોંધનીય છે કે, 1982થી 2000 સુધી પણ ઈઝરાયલી સેના આ કિલ્લા પર નિયંત્રણ ધરાવતી હતી.
ગંભીર આક્રમણ: આ કબજો નાબાતીયેહ શહેર પાસેના વિસ્તારોમાં ઘણા દિવસોથી ચાલી રહેલી તીવ્ર લડાઈ અને હવાઈ હુમલાઓ બાદ થયો છે.
વ્યૂહનીતિ: ઈઝરાયલી સેનાનો હેતુ હિઝબુલ્લાહના ઈન્ફ્રાસ્ટ્રક્ચરને તોડી પાડવાનો અને ઈઝરાયલી નાગરિકો માટેના 'સીધા ખતરા'ને દૂર કરવાનો છે.
નવું યુદ્ધક્ષેત્ર: લિતાની નદી ઓળંગીને ઈઝરાયલી સેના હવે નાબાતીયેહ શહેરથી માત્ર 5 કિમી દૂર છે અને ત્યાંના રહેવાસીઓને શહેર ખાલી કરવાના આદેશ આપ્યા છે.
આ યુદ્ધમાં લેબેનોનમાં માનવીય નુકસાન: 3,350+ મૃત્યુ, 1 મિલિયનથી વધુ વિસ્થાપિત
શાંતિ વાટાઘાટો સામે પડકાર
ઈઝરાયલ અને લેબેનોન વચ્ચે વોશિંગ્ટનમાં 2 જૂનથી ફરીથી રાજદ્વારી વાટાઘાટો યોજાવાની છે. તેમ છતાં, ઈઝરાયલનું આ આક્રમક પગલું એ સાબિત કરે છે કે તેઓ કોઈ પણ સમાધાન પહેલાં પોતાનું સૈન્ય પ્રભુત્વ સ્થાપિત કરવા માંગે છે.
અમે ઓપરેશનને વિસ્તારવા માટે તૈયાર છીએ, જો જરૂર જણાશે તો અમે આગળ પણ વધીશું.
- ઈઝરાયલી સેનાનું સત્તાવાર નિવેદન.
