ન્યુક્લિયર ડીલ પર ટ્રમ્પનો મોટો દાવ, સાઉદી અરેબિયા સામે મૂકી બે મોટી શરતો

US-Saudi Arabia Nuclear Deal : અમેરિકી રાષ્ટ્રપતિ ડોનાલ્ડ ટ્રમ્પે (US President Donald Trump) સાઉદી અરેબિયા સાથેની નાગરિક પરમાણુ ડીલ માટે એક મોટી શરત મૂકી છે. તેમણે સ્પષ્ટ કર્યું છે કે સાઉદી અરેબિયાએ ઈઝરાયેલ સાથે સંબંધ સુધારવા માટે અબ્રાહમ એકોર્ડ્સમાં જોડાવું પડશે. આ સિવાય તેમણે લાલ સમુદ્રમાં સાઉદી તેલ ટેન્કરો પર થયેલા હુમલા બાદ હુથી વિદ્રોહીઓ અને ઈરાનને પણ ભારે પરિણામો ભોગવવાની ધમકી આપી છે.

અબ્રાહમ એકોર્ડ્સમાં જોડાવાની મુખ્ય શરત

ટ્રમ્પે પોતાના સોશિયલ મીડિયા પ્લેટફોર્મ ટ્રુથ સોશિયલ પર લખ્યું કે, 'અમેરિકી ઊર્જા વિભાગ અને સાઉદી અરેબિયા વચ્ચે થઈ રહેલો સિવિલ ન્યુક્લિયર કરાર ફક્ત ગેર-સૈન્ય ઉપયોગ માટે છે. આમાં યુરેનિયમ સંવર્ધનની મંજૂરી આપવામાં આવશે નહીં. આ કરારની મંજૂરી સંપૂર્ણપણે સાઉદી અરેબિયાના અબ્રાહમ એકોર્ડ્સમાં સામેલ થવાની શરત પર જ નિર્ભર રહેશે.' આ પરમાણુ સુવિધા યુએઈ અને ઈરાન પાસે રહેલી સુવિધાઓ જેવી જ રહેશે.

સાઉદી તેલ ટેન્કરો પર હુમલાથી ટ્રમ્પ નારાજ

બીજી એક પોસ્ટમાં ટ્રમ્પે લાલ સમુદ્રમાં 2 સાઉદી તેલ ટેન્કરો પર તાજેતરમાં થયેલા હુમલા પર ભારે નારાજગી વ્યક્ત કરી હતી. તેમણે યાદ અપાવ્યું કે 1 વર્ષ પહેલા અમેરિકાએ કોમર્શિયલ જહાજો પરના હુમલાના જવાબમાં હુથીઓ સામે સખત સૈન્ય કાર્યવાહી કરી હતી. ટ્રમ્પે જણાવ્યું કે અમેરિકા-ઈરાન સંઘર્ષ દરમિયાન હુથીઓનું વલણ જવાબદારીપૂર્વકનું હતું, પરંતુ 2 સાઉદી જહાજો પર હુમલો કરીને તેમણે ફરી ઉપદ્રવ શરૂ કર્યો છે.

ઈરાન અને હુથીઓ પર મોટા સૈન્ય હુમલાની ચેતવણી

ટ્રમ્પે ચેતવણી આપી છે કે હુથી વિદ્રોહીઓ વાસ્તવમાં ઈરાનના જ પ્રતિનિધિ છે. જો હુથીઓ આગળ પણ આવી હરકતો ચાલુ રાખશે, તો અમેરિકા તેના માટે સીધું ઈરાનને જવાબદાર ગણશે. આવી સ્થિતિમાં અમેરિકા દ્વારા ઈરાન અને હુથીઓ બંને પર મોટો સૈન્ય હુમલો કરવામાં આવશે.