ચાલુ યુદ્ધે સંબંધોમાં તિરાડ! ઈરાને કુવૈતમાં ચાઇનીઝ ફર્મ પર કર્યો મિસાઇલોનો મારો, એકનું મોત

Middle East Conflict: ઈરાને હવે પોતાના જ ઈન્ટરનેશનલ પાર્ટનર ચીનની ફર્મ પર હુમલો કર્યો છે. આ હુમલો કુવૈતમાં થયો છે. કુવૈતની સેનાએ જણાવ્યું કે ગુરુવારે સવારે ઈરાનના હુમલામાં ઉત્તરી કુવૈતમાં એક ચીની કંપનીની ઇમારતને નિશાન બનાવવામાં આવી, જેનાથી ઇમારત ખરાબ રીતે ક્ષતિગ્રસ્ત થઈ ગઈ અને એક કર્મચારીનું મોત થઈ ગયું. આ ઘટના જોર્ડનના એર ડિફેન્સ સિસ્ટમ દ્વારા ઈરાનથી છોડવામાં આવેલી પાંચ મિસાઇલોને તોડી પાડવામાં આવ્યાના થોડા કલાકો પછી બની છે.

જોર્ડન હુમલા બાદ અમેરિકાએ IRGCના ઠેકાણાઓ નિશાન બનાવ્યા

આ હુમલા ત્યારે થયા જ્યારે અમેરિકી સેનાએ કહ્યું કે તેણે 'ઈરાન વિરુદ્ધ હુમલાનો એક મોટો તબક્કો' પૂર્ણ કરી લીધો છે. આ હુમલા જોર્ડનમાં અમેરિકન અડ્ડા પર ઈરાન દ્વારા અગાઉ કરવામાં આવેલા મિસાઇલ હુમલાના જવાબમાં કરવામાં આવ્યા હતા. સેન્ટ્રલ કમાન્ડે સોશિયલ મીડિયા પોસ્ટમાં કહ્યું કે અમેરિકાએ ઈરાનના રિવોલ્યુશનરી ગાર્ડ કોર્પ્સના 'ડઝનબંધ' ઠેકાણાઓ પર હુમલા કર્યા. તેમાં મિલિટરી કમાન્ડ સેન્ટર, મિસાઇલ અને ડ્રોન ફેસિલિટી, અને દરિયાકાંઠાની નિરીક્ષણ તથા ડિફેન્સ સાઇટ્સ સામેલ હતી. જોર્ડનની સરકારી સમાચાર એજન્સી 'પેટ્રા'એ દેશની સેનાના પ્રવક્તાને ટાંકીને જણાવ્યું કે જોર્ડન દ્વારા મિસાઇલોને રોકવાથી કોઈ જાનહાનીના સમાચાર નથી.

શાંતિના પ્રયાસો વચ્ચે ઈરાન-ચીન સંબંધોમાં તણાવ શક્ય

ઈરાન યુદ્ધ વચ્ચે ચીન અને ઈરાનના સંબંધો સંતુલિત રહ્યા છે. પરંતુ આ દરમિયાન કુવૈતમાં ચીની ફર્મ પર ઈરાનનો હુમલો બંને દેશોના સંબંધોને તણાવપૂર્ણ બનાવી શકે છે. કૂટનીતિક રીતે ચીને અમેરિકા-ઈઝરાયેલના હુમલાઓની નિંદા કરી, ઈરાનની સાર્વભૌમત્વ અને સુરક્ષાનું સમર્થન કર્યું અને યુદ્ધવિરામની અપીલ કરી. તેણે પાકિસ્તાન સાથે મળીને શાંતિ પ્રસ્તાવ આપ્યા અને ઈરાનને યુદ્ધ રોકવા માટે પ્રેરિત પણ કર્યો. ચીને પોતાને આ ક્ષેત્રમાં શાંતિ સ્થાપનાર દેશ તરીકે દર્શાવ્યો, જ્યારે અમેરિકાને અસ્થિરતા ફેલાવનાર ગણાવ્યો. સાથે જ તેણે અખાતી દેશો સાથે પણ સંતુલન જાળવી રાખ્યું, કારણ કે ત્યાં ચીન મોટા આર્થિક હિતો જોડાયેલા છે.

ચીનની મિસાઇલ સહાય વચ્ચે જ ચીની કંપની પર હુમલો

જ્યાં સુધી ઈરાનની સંરક્ષણ જરૂરિયાતોનો સવાલ છે, તો ચીને ઈરાનની ઘણી મદદ કરી છે. સમાચાર એજન્સી રોયટર્સે દાવો કર્યો છે કે ચીન થોડા જ અઠવાડિયામાં ખભા પરથી છોડી શકાતી 'શોલ્ડર-ફાયર્ડ એર-ડિફેન્સ મિસાઇલ લોન્ચર'ની પહેલી ખેપ તેહરાન મોકલવાનું છે. ચીન કુલ મળીને 400 મિસાઇલોની ખેપ ઈરાનને સપ્લાય કરવા જઈ રહ્યું છે. પરંતુ છેલ્લી ઘડીએ ઈરાન દ્વારા કુવૈતમાં ચાઈનીઝ ફર્મ પર હુમલાના સમાચાર આવ્યા છે.

યુદ્ધ સ્થિતિ વચ્ચે સાઉદી અરેબિયાની એન્ટ્રી

ઈરાન અને અમેરિકાની લડાઈ શરૂ થયાને લગભગ અડધું વર્ષ પૂર્ણ થવા આવ્યું છે. પરંતુ આ લડાઈ દિવસે અને દિવસે વધુ ગંભીર બનતી જાય છે. હવે આ યુદ્ધમાં સાઉદી અરેબિયાની સીધી એન્ટ્રી થઈ ગઈ છે. સાઉદી અરેબિયાએ ઈરાકી મિલિશિયા પર છેલ્લા કેટલાક દિવસોમાં પોતાના ક્રૂડના ઠેકાણાઓ પર ડ્રોનથી હુમલો કરવાનો આરોપ લગાવ્યો છે. ઈરાકી મિલિશિયાના એક ગ્રુપે શરૂઆતમાં આ આરોપોને ફગાવી દીધા હતા, જ્યારે ઈરાન સમર્થિત અન્ય એક ગ્રુપ એટલે કે યમનના હૂથી વિદ્રોહીઓએ કહ્યું કે તેમણે એક અલગ પરંતુ સંબંધિત સંઘર્ષ હેઠળ સાઉદી એનર્જી સાઇટ પર હુમલો કર્યો હતો.