ટ્રમ્પના 'ટૅરિફ સામ્રાજ્ય'ને ભારતીય મૂળના વકીલે હચમચાવી દીધું, જાણો કોણ છે નીલ કાત્યાલ

Neal Katyal: અમેરિકાના ન્યાયિક ઇતિહાસમાં એક ખૂબ જ મહત્ત્વનો અને મોટા ફેરફાર જોવા મળ્યા છે. અમેરિકન સુપ્રીમ કોર્ટે ડોનાલ્ડ ટ્રમ્પને મોટો ઝટકો આપતા તેમના ટૅરિફ લાદવાના નિર્ણયને રદ કરી દીધો છે. કોર્ટે સ્પષ્ટ શબ્દોમાં જણાવ્યું છે કે, જનતા પર ટૅરિફ કે ટેક્સ લગાવવાનો અધિકાર માત્ર કોંગ્રે (સંસદ) પાસે છે, અમેરિકન પ્રમુખ પાસે નહીં. આ ઐતિહાસિક ચુકાદામાં ટ્રમ્પ વિરુદ્ધ કાનૂની લડાઈ લડવાનો શ્રેય એક ભારતીય મૂળના દિગ્ગજ વકીલ નીલ કાત્યાલને જાય છે. કાત્યાલ ભૂતકાળમાં બરાક ઓબામાના શાસનકાળ દરમિયાન એડિશનલ સોલિસિટર જનરલ તરીકે સેવા આપી ચૂક્યા છે.

નાના વેપારીઓની લડાઈ અને નીલ કાત્યાલની મજબૂત રજૂઆત

નીલ કાત્યાલે સુપ્રીમ કોર્ટમાં 1977ના 'ઇન્ટરનેશનલ ઈમરજન્સી ઈકોનોમિક પાવર્સ ઍક્ટ'ના દુરુપયોગ અંગે દલીલો રજૂ કરી હતી. તેમણે કોર્ટને જણાવ્યું હતું કે, ટ્રમ્પનો આ નિર્ણય સંપૂર્ણપણે ગેરબંધારણીય છે. કોર્ટના ચુકાદા બાદ કાત્યાલે ગર્વ સાથે કહ્યું કે, 'આજે અમેરિકામાં કાયદાનું શાસન સર્વોપરી સાબિત થયું છે. પ્રમુખ ગમે તેટલા શક્તિશાળી હોય, પરંતુ તેઓ બંધારણથી ઉપર નથી.' આ કેસ નાના વેપારીઓએ સાથે મળીને સુપ્રીમ કોર્ટ સુધી પહોંચાડ્યો હતો, જેની રજૂઆત કાત્યાલે એટલી મજબૂત રીતે કરી કે કોર્ટે બંધારણીય મર્યાદાઓને પ્રાધાન્ય આપ્યું.

જાણો કોણ છે આ ભારતીય વકીલ નીલ કાત્યાલ

નીલ કાત્યાલના માતા-પિતા મૂળ ભારતીય હતા, જેઓ અમેરિકા સ્થાયી થયા હતા. કાત્યાલનો જન્મ શિકાગોમાં થયો હતો. તેમના માતા-પિતા ડૉક્ટર અને એન્જિનિયર હોવા છતાં નીલે કાયદાના ક્ષેત્રમાં કારકિર્દી બનાવવાનું પસંદ કર્યું. તેમણે વિશ્વવિખ્યાત યેલ લૉ સ્કૂલમાંથી ગ્રેજ્યુએશન કર્યું અને બાદમાં જસ્ટિસ સ્ટીફન બ્રેયર સાથે કામ કરીને અનુભવ મેળવ્યો. 2010માં બરાક ઓબામાએ તેમને કાર્યકારી સોલિસિટર જનરલ બનાવ્યા હતા.

આ પણ વાંચો: સહારાના રણમાંથી 9.5 કરોડ વર્ષ જૂની ડાયનાસોરની અનોખી પ્રજાતિના અવશેષો મળ્યાં, 40 ફૂટની ઊંચાઈ

ફોર્બ્સની યાદીમાં સ્થાન: વિશ્વના સૌથી પ્રભાવશાળી વકીલોમાં સ્થાન  

લઘુમતિ વકીલ તરીકે અમેરિકાની સુપ્રીમ કોર્ટમાં સૌથી વધુ કેસ લડનારા તેઓ પ્રથમ વ્યક્તિ છે. અગાઉ તેમણે વોટિંગ રાઇટ ઍક્ટ અને ટ્રમ્પના ટ્રાવેલ બેન વિરુદ્ધ પણ મજબૂત લડાઈ લડી હતી. તેમની અસાધારણ સેવાઓ માટે અમેરિકાના જસ્ટિસ ડિપાર્ટમેન્ટ દ્વારા તેમને નાગરિક સન્માન પણ આપવામાં આવ્યું છે અને ફોર્બ્સ જેવી સંસ્થાઓએ પણ તેમને વિશ્વના ટોચના વકીલોની યાદીમાં સ્થાન આપ્યું છે.