કેનેડામાં 13.9 કરોડ ડોલરનું ડ્રગ્સ જપ્ત 11 ભારતીય ટ્રક ડ્રાઇવરની ધરપકડ

ઓટાવા: કેનેડાનાં ઓંટારિયોમાં સરહદ પર ચાલી રહેલા એક મોટા ગેરકાયદે ડ્રગ્સ દાણચોરી નેટવર્કનો પર્દાફાશ થયો છે. કેનેડા બોર્ડર સર્વિસીસ એજન્સીએ ૧.૭ ટન ગેરકાયદે ડ્રગ્સ જપ્ત કર્યુ છે. આંતરરાષ્ટ્રીય બજારમાં આ ડ્રગ્સની કીંમત ૧૩.૯ કરોડ ડોલર બતાવવામાં આવી રહી છે. પ્રોજેક્ટ બે નામનાં આ વિશેષ અભિયાન હેઠળ પોલીસે વિંડસર, લાસેલ, કોરન્ના, બ્રૈમ્પટન, માર્ખમ અને કેલેડન સહિત ઓંટારિયોનાં અનેક વિસ્તારોમાં ૨૨ સ્થળોએ દરોડા પાડી ૧૯ આરોપીઓની ધરપકડ કરી છે.
જેમાં ભારતીય મૂળનાં ટ્રક ડ્રાઇવર્સ સામેલ છે. ભારતીય મૂળની વ્યકિતઓની ઓળખ ગગનદીપ થિંડલ, સિમરનજીત સિંહ, કંવરપાલ કુલાર, જતિંદરપાલ સિંહ, જસવિંદર સોહી, તેજવિંદર સંધુ, હરજવિંદર સંધુ, તરમિંદર સિંહ, ગુનદીપ તારિવાલ, મહકપ્રીત સિંહ અને કરણદીપ સિંહ તરીકે કરી છે.
કેનેડા બોર્ડર સર્વિસીસ એજન્સીએ જણાવ્યું હતું કે અધિકારીઓએ શંકાસ્પદ કોકીન, મેથમ્ફેટામાઇન અને અફીણ સહિત લગભગ ૧.૭ ટન ગેરકાયદે ડ્રગ્સ જપ્ત કર્યુ છે. જેની અંદાજિત કીંમત ૧૩.૯ કરોડ ડોલર છે.
પોલીસે ૯૭૩ કીલોગ્રામ કોકીન, ૫૫૦ કીલોગ્રામ મેથમ્ફેટામાઇન, ૪૯ કીલો અફીણ અને ૨૩૦ ઓક્સીકોડોનની ગોળીઓ જપ્ત કરી છે.
પોલીસે ૧૭ શસ્ત્રો પણ જપ્ત કર્યા છે. જેમાં એક ટેન્ક વિરોધી રાયફલ પણ સામેલ છે. આ ઉપરાંત રોકડ, કીંમતી ઘરેણા, એક વાહન, ૪૩ મોબાઇલ ફોન અને છ લેપટોપ પણ જપ્ત કર્યા છે.
એજન્સીએનાં જણાવ્યા અનુસાર પ્રોજેકેટ બે જાન્યુઆરી, ૨૦૨૫માં શરૂ કરવામાં આવ્યું હતું. તપાસમાં જાણવા મળ્યું હતું કે આ જૂથ કેનેડા અને અમેરિકા વચ્ચે ચાલતી કોમર્શિયલ ટ્રકોનો ઉપયોગ કરી ડ્રગ્સની દાણચોરી કરતું હતું.