Donald Trump News : ઓરેગોનના પોર્ટલેન્ડમાં 200 નેશનલ ગાર્ડ સૈનિકો તહેનાત કરવાના અમેરિકન પ્રમુખ ડોનાલ્ડ ટ્રમ્પના નિર્ણયને શનિવારે મોટો ઝટકો લાગ્યો. એક ફેડરલ કોર્ટે આ નિર્ણય પર 18 ઓક્ટોબર સુધી સ્ટે મૂક્યો છે.
જુઓ કોર્ટે શું કહ્યું?
ટ્રમ્પના પહેલા કાર્યકાળ દરમિયાન નિયુક્ત થયેલા યુએસ ડિસ્ટ્રિક્ટ જજ કરીન ઇમરગુટે આ આદેશ જારી કર્યો હતો. તેમણે કહ્યું કે વહીવટીતંત્રે એવા કોઈ પુરાવા રજૂ કર્યા નથી કે પોર્ટલેન્ડમાં વિરોધ પ્રદર્શન "બળવા" ના સ્તરે પહોંચી ગયા હોય અથવા કાયદો અને વ્યવસ્થામાં ગંભીર દખલ કરી હોય.
કોર્ટમાં શું દલીલો થઇ?
ઓરેગોનના એટર્ની જનરલ ડેન રેફિલ્ડે ટ્રમ્પ સરકારના આ પગલાને કોર્ટમાં પડકાર્યો હતો. તેમણે દલીલ કરી હતી કે પ્રમુખ નેશનલ ગાર્ડને ગેરકાયદેસર રીતે નિયંત્રિત કરવા માટે તેમની ઇમિગ્રેશન નીતિઓ સામે શાંતિપૂર્ણ વિરોધ પ્રદર્શનોને અતિશયોક્તિપૂર્ણ રીતે રજૂ કરી રહ્યા છે.
ઓરેગોન સરકારનો ટ્રમ્પ વહીવટીતંત્ર પર આરોપ
ઓરેગોન સરકારે કોર્ટને જણાવ્યું હતું કે ટ્રમ્પનો નિર્ણય રાજ્યની સ્વાયત્તતા પર હુમલો અને ફેડરલ કાયદાનું ઉલ્લંઘન છે. કોર્ટ ફાઇલિંગમાં જણાવાયું છે કે ટ્રમ્પે 2020 માં ફોક્સ ન્યૂઝ પર દર્શાવવામાં આવેલા મોટા અને હિંસક દેખાવોના વીડિયો જોયા પછી આ આદેશ જારી કર્યો હતો, જ્યારે આ વખતે દેખાવો "નાના અને શાંતિપૂર્ણ" હતા. રાજ્ય સરકારના વકીલોએ જણાવ્યું હતું કે જૂનના મધ્યમાં ફક્ત 25 લોકોની ધરપકડ કરવામાં આવી હતી અને ત્યારથી ત્રણ મહિનામાં કોઈ ધરપકડ કરવામાં આવી નથી. વ્હાઇટ હાઉસે સંકેત આપ્યો છે કે તે આદેશને પડકારશે.
આ પણ વાંચોઃ એચ-1બી વિઝા ફી 1 લાખ ડોલર કરવા સામે ફેડરલ કોર્ટમાં કેસ
ગાર્ડ તહેનાત કેમ કરવા માગે છે ટ્રમ્પ સરકાર?
શનિવારે સાંજે દક્ષિણ પોર્ટલેન્ડમાં ICE હેડક્વાર્ટરની બહાર દેખાવકારો એકઠા થયા હતા અને સુરક્ષા દળો વિરુદ્ધ સૂત્રોચ્ચાર કર્યા હતા, પરંતુ પરિસ્થિતિ નિયંત્રણમાં રહી હતી. ટ્રમ્પ વહીવટીતંત્રનું કહેવું છે કે ફેડરલ ઇમારતોને "ઘરેલું આતંકવાદ" થી બચાવવા માટે આ પગલું જરૂરી છે, જ્યારે વિપક્ષી ડેમોક્રેટિક નેતાઓ તેને રાજકીય હસ્તક્ષેપ અને સત્તાનો દુરુપયોગ ગણાવી રહ્યા છે.
