ઈરાન સામે પહેલીવાર અમેરિકાએ ઘાતક B-1 બોમ્બર વિમાન ઉતાર્યું, મહાયુદ્ધના ભણકારાં

B1 Lancer Bomber: અમેરિકા અને ઈરાન વચ્ચે ચાલતી જંગ હવે વધુ ખતરનાક વળાંક પર પહોંચી ગઈ છે. અમેરિકન સેનાએ મંગળવારે પ્રથમ વખત B-1 લાન્સર લોંગ-રેન્જ બોમ્બરનો ઉપયોગ કરીને ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC)ના ઠેકાણાઓ પર ભીષણ હુમલો કર્યો છે. અમેરિકન અધિકારીઓના જણાવ્યા મુજબ, 12 દિવસ પહેલા યુદ્ધ ફરી શરૂ થયા બાદ આ પહેલીવાર બન્યું છે જ્યારે B-1 લાન્સર બોમ્બરને મિશન પર મોકલવામાં આવ્યું હોય.

B-1 બોમ્બરની તાકાત અને હોર્મુઝ સ્ટ્રેટમાં તણાવ

B-1 બોમ્બર અમેરિકન વાયુસેનાનું સૌથી શક્તિશાળી વિમાન છે, જે ઓછી ઊંચાઈ પર અવાજ કરતાં પણ વધુ ઝડપે ઉડીને સૌથી વધુ વજનના બોમ્બ લઈ જઈ શકે છે. આ વિમાન 2,000 પાઉન્ડના બે ડઝન જેટલા બોમ્બ અથવા ડઝનબંધ મિસાઇલ લઈ જવા માટે સક્ષમ છે અને તેણે બ્રિટનના એરબેઝ પરથી ઉડાન ભરી હતી. અમેરિકન સેન્ટ્રલ કમાન્ડના જણાવ્યા અનુસાર, આ બોમ્બરે ઈરાનના સૈન્ય મથકો, ડ્રોન સ્ટોરેજ, વિમાન હેંગર અને દરિયાઈ ક્ષમતા વાળા ઠેકાણાઓ પર હુમલા કર્યા છે, જેથી હોર્મુઝ સ્ટ્રેટમાંથી પસાર થતાં જહાજો પર હુમલો કરવાની ઈરાનની તાકાતને નબળી પાડી શકાય.

ટ્રમ્પ અને ઈરાન વચ્ચે સામસામે ધમકીઓ

અમેરિકન પ્રમુખ ડોનાલ્ડ ટ્રમ્પ ઈરાન સામે હજુ પણ મોટા સૈન્ય અભિયાન પર વિચાર કરી રહ્યા છે અને આગામી દિવસોમાં આ લડાઈ વધુ તીવ્ર બની શકે છે. ટ્રમ્પે ચેતવણી આપી છે કે જો ઈરાને હોર્મુઝ સ્ટ્રેટમાં જહાજો પર હુમલા ચાલુ રાખ્યા, તો અમેરિકા તેહરાન સહિત ઈરાનના પુલો અને પાવર પ્લાન્ટ્સને નિશાન બનાવી શકે છે. બીજી તરફ, અમેરિકાના વ્યાપક હુમલા છતાં ઈરાનનું વલણ નરમ પડ્યું નથી અને તેણે પણ અમેરિકન સાથી ખાડી દેશોના ઇન્ફ્રાસ્ટ્રક્ચરને નિશાન બનાવવાની ધમકી આપી છે.

રેડ સીમાં હૂથી બળવાખોરોનો હુમલો અને શાંતિ વાટાઘાટો

બીજી તરફ, ઈરાનની ઉશ્કેરણીથી યમનના હૂથી બળવાખોરોએ રેડ સીમાં સાઉદી અરેબિયાના બંદરો પર નાકાબંધીની જાહેરાત કરીને સાઉદી જહાજો પર પહેલો હુમલો કરી દીધો છે. જેના કારણે અનેક કોમર્શિયલ જહાજોએ પોતાના રસ્તા બદલી નાખ્યા છે. આ દરમિયાન કતાર અને ઓમાનની મધ્યસ્થતાથી હોર્મુઝ સ્ટ્રેટને ફરીથી ખોલવા અને યુદ્ધ રોકવાના પ્રયાસો ચાલી રહ્યા છે, પરંતુ ઈરાને નવો પ્રસ્તાવ સ્વીકાર્યો ન હોવાથી હજુ સુધી કોઈ નક્કર સફળતા મળી નથી. જોકે, પ્રમુખ ટ્રમ્પે દાવો કર્યો છે કે ઈરાનને ભારે નુકસાન થઈ રહ્યું છે અને તે બહુ જલ્દી સમજૂતી માટે તૈયાર થઈ જશે.