Vadodara Crime : વડોદરામાં નાના ભાઇએ પ્રેમ લગ્ન કરતા મોટા ભાઇને માર ખાવાનો વારો આવ્યો હતો. યુવતીના પરિવારે હોકી વડે હુમલો કરતા મોટા ભાઇને 10 ટાંકા આવ્યા હતા.
નવાપુરા રબારીવાસમાં રહેતો જય જીતેન્દ્રભાઇ પોમલા મકરપુરા જી.આઇ.ડી.સી.ની ખાનગી કંપનીમાં નોકરી કરે છે. મકરપુરા પોલીસ સ્ટેશનમાં તેણે ફરિયાદ નોંધાવી જણાવ્યું છે કે, અગાઉ અમે દંતેશ્વર વામ્બે હાઉસિંગ વુડાના મકાનમાં રહેતા હતા. ત્યારે મારા નાના ભાઇ પીયૂષ તથા અમારી સામે રહેતી હિરલ વિજયભાઇ પરમાર ભાગી ગયા હતા. જેથી, હિરલના માતા, પિતા અમને મારવાની ધમકી આપતા હોઇ અમે તે ઘર ખાલી કરીને નવાપુરામાં પરિવાર સાથે રહેવા આવી ગયા હતા. ત્યારબાદ મારા નાના ભાઇ પીયૂષે હિરલ સાથે પ્રેમ લગ્ન કરી લીધા હતા. જેથી, ગઇકાલે હું તથા મારા મામાનો દીકરો હર્ષદ ભાડાનો ટેમ્પો લઇને દંતેશ્વર ખાતે સામાન ભરવા ગયા હતા. ત્યારે હિરલના માતા શકુંતલાબેન, પિતા વિજયભાઇ તથા અન્યએ મારી સાથે ઝઘડો કર્યો હતો. મારા પર હોકી વડે હુમલો કરી હાથ અને માથાના ભાગે ઇજા પહોંચાડી આરોપીઓએ જાનથી મારી નાખવાની ધમકી આપી હતી.
