વડોદરા, તા.16 વડોદરા નજીક ખટંબા પાસે ગટરની કામગીરી દરમિયાન ગટરમાં ઉતરેલા બે યુવાનના મોતની ઘટના બાદ પોલીસે મુખ્ય તેમજ પેટા કોન્ટ્રાક્ટર સામે ગુનો દાખલ કરી તપાસ શરૃ કરી છે. દસ્તાવેજી પુરાવા એકત્ર કર્યા બાદ ધરપકડનો દોર શરૃ કરાશે.
ઉલ્લેખનીય છે કે ખટંબામાં હિમાલયા પાર્ટી પ્લોટના પાર્કિગમાં ગટર લાઇનની કામગીરી દરમિયાન અંદર ઉતરેલા મજૂર સહિત બે શખ્સો ગુંગળાઇ જવાથી મોતને ભેટયા હતાં. આ અંગે પ્રથમ અકસ્માત મોતની નોંધ કરાઇ હતી અને બાદમાં મૃતક વિપુલ મનસુખ માંગરોલીયાના પિતરાઇ ભાઇ ભાવેશ બાબુભાઇ પટેલ (રહે.લાઇટ હાઉસ, ભક્તિ સર્કલ, નિકોલ, અમદાવાદ)એ જયંતિ અંબાલાલ પટેલ (જયંતિ સુપર કન્સ્ટ્રક્શન પ્રા.લી.ના પ્રોપરાઇટર, સહજાનંદ સોસાયટી, માલગોડાઉન રોડ, મહેસાણા) અને સંજય માધવજીભાઇ ખુંટ (ગ્રીસ્વા ઇન્ફ્રા પ્રોજેક્ટ એલએલપીના પ્રોપરાઇટર, શ્રીધર ફ્લોરા, ગેલેકસી બિઝનેસપાર્ક, નિકોલ રિંગરોડ, અમદાવાદ) સામે વરણામા પોલીસ સ્ટેશનમાં એટ્રોસિટિ એક્ટ તેમજ અન્ય ગુના સંદર્ભે ફરિયાદ નોંધાવતા તપાસ ડીવાયએસપીએ શરૃ કરી છે.
ફરિયાદમાં ઉલ્લેખ કર્યો છે કે વુડા દ્વારા હનુમાનપુરા, અણખોલ, બાપોદ અને ખટંબા ખાતે આવેલ ૧૮ મીટર રોડ પર ડ્રેનેજ લાઇનની કામગીરીનો કોન્ટ્રાક્ટ ઓક્ટોબર-૨૦૨૨માં જયંતિ સુપર કન્સ્ટ્રક્શન પ્રા.લી.ને અપાયો હતો બાદમાં જયંતિએ મે-૨૦૨૩માં ગ્રીસ્વા ઇન્ફ્રા પ્રોજેક્ટને પેટા કોન્ટ્રાક્ટ આપ્યો હતો. ગટર લાઇનની કામગીરી દરમિયાન સલામતીના સાધનો રક્ષણાત્મક કપડા, હાથમાં પહેરવાના ભારે અને લાંબા રબરના મોજા, શ્વસન સુરક્ષા માટે ફેસ માસ્ક, રેસ્પીરેટર માટે ઓક્સિજન ગેસની વ્યવસ્થા, આંખો અને ચહેરા માટે સેફ્ટી ગોગલ્સ અથવા ફેસ શિલ્ડ, હાર્નેસ સાથે ટ્રાઇપોડ પૂરા પાડયા ન હતાં. દરમિયાન પોલીસે આજે સ્થળ નિરિક્ષણ કરીને વુડાના એન્જિનિયરોના જવાબો મેળવી પુરાવા એકત્ર કરવાનું શરૃ કર્યુ છે.
ગટરનું ચેમ્બર જેસીબીથી તોડી બંનેને બહાર કઢાયા હતા
ગટર લાઇનનું અન્ય સ્થળે કામ કરતા કેટલાંક મજૂરોએ વિપુલ માંગરોલીયા અને અક્ષય ભાભોરને ફોન કરતા માત્ર રિંગ વાગતી હતી જેથી મજૂરોએ સ્થળ પર જઇને ચેમ્બરમાં તપાસ કરતા બંને બેભાન મળ્યા હતાં અને ખૂબ જ ખરાબ ગેસની દુર્ગધ મારતી હતી. ગટરની ચેમ્બરમાં મળનો બગાડ પણ હતો તેમજ ચેમ્બરનું ઢાંકણું સાંકડું હતું તાત્કાલિક જેસીબી મંગાવીને ચેમ્બર તોડી બંનેને બહાર કાઢવા પડયા હતાં.
જયંતિ પટેલની જેલમાંથી ટ્રાન્સફર વોરંટથી ધરપકડ કરાશે
સુરત જિલ્લામાં પાણીની ટાંકી તૈયાર થઇ અને પ્રથમ વખત જ પાણી ભરતા આખી ટાંકી તૂટી જવાની ઘટના બની હતી. હલકી કક્ષાની કામગીરી જયંતિ સુપર કન્સ્ટ્રક્શન પ્રા.લી. દ્વારા કરવામાં આવી હતી જેથી તે સમયે કોન્ટ્રાક્ટર સામે ગુનો દાખલ કરી જયંતિ પટેલની ધરપકડ કરી તેઓને જેલમાં ધકેલી દેવાયા છે. વડોદરામાં પણ ગટરનું કામ જયંતિ સુપર કન્સ્ટ્રક્શન પ્રા.લી.એ કર્યું છે અને બેના મોત અંગે જયંતિ પટેલ પણ આરોપી છે જેથી તેઓનો ટ્રાન્સફર વોરંટથી જેલમાંથી કબજો મેળવાશે.
