Vadodara Police : વડોદરાના ફતેગંજ વિસ્તારમાં આવેલી કેફેમાં કેટલાક તત્વો દ્વારા તોડફોડ કરી સંચાલક સાથે ઝપાઝપી કરવામાં આવી હોવાનો બનાવ બનતા પોલીસે તપાસ હાથ ધરી છે.
ફતેગંજ પત્રકાર કોલોની નજીક રહેતા અને જુના વુડા નજીક કેફે ધરાવતા સૈદુલ રહેમાન ખાને પોલીસને કહ્યું છે કે, ગઈકાલે બપોરે હું અને મારો ભાઈ અજીજૂર બીજી દુકાને હતા ત્યારે મારા સાળા સુફિયાને ફોન કરીને કહ્યું હતું કે નવા યાર્ડ રોશનનગરનો જમીર પઠાણ અને તેનો મિત્ર અરમાન પઠાણ કેફેમાં બહારથી ખાવાનું લાવીને ગમે તેવું વર્તન કરી સ્ટાફ સાથે માથાકૂટ કરે છે.
જેથી અમે બંને ભાઈઓ કેફે ઉપર આવતા જમીરખાન અને તેના સાગરીતે મારા સાળા ઉપર પુલ રમવાની સ્ટીક લઈને હુમલાનો પ્રયાસ કર્યો હતો. મારા ભાઈએ તેને પકડી લેતા જમીરખાને તેને બચકું ભર્યું હતું અને ત્યારબાદ દુકાનના ગેટનું પાર્ટીશન તેમજ ખુરશીઓની તોડફોડ કરી હતી. પોલીસે બંને આરોપીઓ સામે ગુનો નોધી તપાસ હાથ ધરી છે.
