ગોધરા: ગેસની અછત વચ્ચે કાળાબજારીનું નેટવર્ક? એજન્સીમાંથી બિનહિસાબી સિલિન્ડરનો જથ્થો ઝડપાયો

Godhra News: એક તરફ સામાન્ય ગ્રાહકો અને વેપારીઓ ગેસ સિલિન્ડરની અછતનો સામનો કરી રહ્યા છે, ત્યારે બીજી તરફ એજન્સીઓ દ્વારા જથ્થાનો ગેરકાયદે સંગ્રહ કરવામાં આવતો હોવાનું સામે આવ્યું છે. પંચમહાલ જિલ્લા પુરવઠા વિભાગે ગોધરાની 'ઘનશ્યામ ગેસ એજન્સી' પર આકસ્મિક દરોડા પાડીને રૂ. 33,785 ની કિંમતનો બિનહિસાબી જથ્થો સીઝ કર્યો છે.

અછત વચ્ચે કાળાબજારીનું અનુમાન?

છેલ્લા કેટલાક સમયથી ગેસના પુરવઠાને લઈને બજારમાં બૂમરાણ મચી છે. આવી સ્થિતિમાં જ્યારે પુરવઠા અધિકારીએ હિતેશભાઈ ધરમચંદાણી સંચાલિત એજન્સીના ગોડાઉનમાં તપાસ કરી, ત્યારે ચોંકાવનારી વિગત સામે આવી હતી. સ્ટોક રજિસ્ટરમાં નોંધાયેલા જથ્થા કરતા 17 નંગ કોમર્શિયલ ગેસ સિલિન્ડર (19 કિલો) વધારે મળી આવ્યા હતા.

જ્યારે બજારમાં કૃત્રિમ અછત ઊભી કરીને ઊંચા ભાવે સિલિન્ડર વેચવાનો કારસો થતો હોય, ત્યારે આવા બિનહિસાબી સિલિન્ડરો 'કાળાબજારી'ની આશંકા પ્રબળ બનાવે છે.

આ પણ વાંચો: યુદ્ધની ઇફેક્ટ : ગેસ સિલિન્ડરની ડિલિવરી નીતિમાં થયેલા ફેરફારથી ગ્રાહકોની ગેસ એજન્સી ઓફિસે લાંબી કતાર : કાળા બજારીયા સક્રિય

તંત્રની કડક કાર્યવાહી

જિલ્લા કલેક્ટરના આદેશથી પુરવઠા વિભાગે સમગ્ર જિલ્લામાં તપાસ તેજ કરી છે. અધિકારીઓએ જણાવ્યું હતું કે, જે એજન્સીઓ જથ્થો છુપાવશે અથવા રજિસ્ટરમાં ખોટી વિગતો દર્શાવશે તેમની સામે ફોજદારી રાહે પગલાં લેવામાં આવશે. ઘનશ્યામ ગેસ એજન્સી સામે હાલ કાયદેસરની કાર્યવાહી શરૂ કરી દેવામાં આવી છે.