અમદાવાદમાં શહેરકોટડામાં સામૂહિક દુષ્કર્મ આચરનારા બે ઝડપાયા, બ્લેકમેલિંગ કરીને ધમકીઓ આપી હતી

Ahmedabad Crime News: અમદાવાદના શહેરકોટડા વિસ્તારમાં સામૂહિક દુષ્કર્મની ઘટના સામે આવી છે. એક યુવતીને તેના પરિણીત પુરુષ મિત્ર સાથેની અંગત તસવીરો સમાજમાં જાહેર કરી દેવાની અને પરિવારને જાનમાલનું નુકસાન પહોંચાડવાની ધમકી આપીને બે નરાધમોએ હોટેલમાં લઈ જઈ સામૂહિક દુષ્કર્મ આચર્યું હતું.  ભોગ બનનાર પીડિતાએ આ મામલે 23મી મેના રોજ ફરિયાદ નોંધાવતા શહેરકોટડા પોલીસે ગણતરીના કલાકોમાં બંને નરાધમ આરોપીઓની ધરપકડ કરી કાયદેસરની કાર્યવાહી હાથ ધરી છે.

જાણો શું છે સમાગ્ર મામલો

સમગ્ર ઘટનાની વિગતો આપતા શહેરકોટડા પોલીસ મથકના પીઆઇ (PI) વી. જે. ચૌધરીએ જણાવ્યું હતું કે, 'પીડિતા તેના એક પરિણીત મિત્ર સાથે અવારનવાર બહાર હરવા-ફરવા અને જમવા જતી હતી. આ પુરુષ મિત્રના સંપર્કથી મિત અને તેજસ નામના બે યુવકો પીડિતાના પરિચયમાં આવ્યા હતા. ત્યારબાદ આ બંને આરોપીઓએ યુવતી અને તેના મિત્રના અંગત ફોટા પોતાની પાસે હોવાનો દાવો કરી બ્લેકમેલ કરવાનું શરૂ કર્યું હતું. બદનામી અને પરિવારને નુકસાન પહોંચાડવાના ડરનો ગેરલાભ ઉઠાવીને બંને શખસો યુવતીને બળજબરીથી નિકોલ વિસ્તારની એક હોટેલમાં લઈ ગયા હતા અને ત્યાં બે વખત તેની પર સામૂહિક દુષ્કર્મ આચર્યું હતું.'

ઝડપાયેલા બંને આરોપીઓ પરિણીત અને મજૂર

પીડિતાની ફરિયાદ મળતાં જ પોલીસે તાત્કાલિક એક્શન મોડમાં આવીને બંને આરોપીઓ મિત ઉર્ફે મયંક મકવાણા અને તેજસ ઉર્ફે જોગી ચાચા લેઉવાને દબોચી લીધા છે. પોલીસની પ્રાથમિક તપાસમાં સામે આવ્યું છે કે આ બંને આરોપીઓ પોતે પણ પરિણીત છે અને છૂટક મજૂરી કામ કરીને પોતાનું ગુજરાન ચલાવે છે.

મોબાઈલ ફોન જપ્ત, વીડિયો ઉતાર્યો હોવાની શંકા

પીડિતાએ આશંકા વ્યક્ત કરી છે કે દુષ્કર્મ આચરતી વખતે આરોપીઓએ મોબાઈલમાં વીડિયો પણ ઉતાર્યો હતો. આ ગંભીર બાબતને ધ્યાનમાં રાખીને પોલીસે બંને આરોપીઓના મોબાઈલ ફોન જપ્ત કર્યા છે અને એફએસએલ (FSL)ની મદદથી તે દિશામાં તપાસ લંબાવી છે. હાલમાં બંને આરોપીઓના મેડિકલ ટેસ્ટ કરાવવા અને ઘટનાસ્થળનું પંચનામું કરી વધુ વૈજ્ઞાનિક પુરાવા એકત્ર કરવા સહિતની આગળની તજવીજ પોલીસ દ્વારા ચલાવવામાં આવી રહી છે.