વડોદરા પાલિકાની ચૂંટણીમાં ઉમેદવારી પત્ર ભરવા કાલે અંતિમ દિવસ : ઉમેદવારો ઉમટી પડશે

Vadodara Corporation : વડોદરા પાલિકાની આવનારી ચૂંટણી માટે ઉમેદવારી પત્ર ભરવાની પ્રક્રિયામાં હવે અંતિમ તબક્કો આવી પહોંચ્યો છે. આવતીકાલે ઉમેદવારી પત્ર ભરવાનો છેલ્લો દિવસ હોવાને કારણે રાજકીય પક્ષો તેમજ અપક્ષ ઉમેદવારોમાં ભારે ચહલપહલ જોવા મળી રહી છે. ખાસ કરીને ભાજપ દ્વારા હજુ સુધી શહેરના એકપણ ઉમેદવારોના નામ જાહેર કરવામાં આવ્યા નથી, જેના કારણે અંતિમ ઘડીએ નામ જાહેર થતાં ઉમેદવારોમાં દોડધામ થશે. પક્ષ તરફથી ઉમેદવારી જાહેર થતા જ ઉમેદવારોને જરૂરી દસ્તાવેજો તૈયાર કરવા માટે ખૂબ ઓછો સમય મળશે. તેમાં પોલીસ ક્લિયરન્સ સર્ટિફિકેટ, એફિડેવિટ, ચૂંટણી ખર્ચ સંબંધિત વિગતો, રહેઠાણનો પુરાવો સહિતના વિવિધ દસ્તાવેજો તૈયાર કરવાની ફરજ પડે છે. આ તમામ પ્રક્રિયા પૂર્ણ કરવા માટે ઉમેદવારો અને તેમના સમર્થકોને તંત્રના કચેરીઓમાં દોડધામ કરવી પડે તેવી સ્થિતિ સર્જાય તેવી સંભાવના છે.

પોલીસ ક્લિયરન્સ સર્ટિફિકેટ મેળવવાની પ્રક્રિયા પણ મહત્વપૂર્ણ હોવાને કારણે ઉમેદવારો પોલીસ સ્ટેશનો અને સંબંધિત કચેરીઓનો સંપર્ક સાધતા જોવા મળશે. ઉપરાંત ચૂંટણી અધિકારીની કચેરીએ પણ ઉમેદવારી ફોર્મ લેવા અને ભરવા માટે ભીડ વધવાની શક્યતા વ્યક્ત કરવામાં આવી રહી છે. રાજકીય પક્ષો અંતિમ ક્ષણ સુધી જીતની સંભાવનાઓનું મૂલ્યાંકન કરીને ઉમેદવારો જાહેર કરતા હોવાથી કાર્યકર્તાઓમાં પણ ઉત્સુકતા જોવા મળી રહી છે. ઘણા કાર્યકર્તાઓ પોતાનું નામ જાહેર થવાની આશા રાખી રહ્યા છે, જ્યારે કેટલાક વોર્ડમાં ટિકિટ માટે આંતરિક ખેંચતાણ પણ જોવા મળી રહી છે.

આ રીતે આવતીકાલે ઉમેદવારી પત્ર ભરવાનો અંતિમ દિવસ હોવાથી શહેરમાં રાજકીય માહોલ ગરમાયો છે અને ચૂંટણી પ્રક્રિયા વધુ તેજ બની રહી છે. ભાજપ અને કોંગ્રેસ બંને પક્ષના ઉમેદવારો વચ્ચે ભારે પ્રતિસ્પર્ધા રહેશે જો અવાજ સબકે ચૂંટણી ફોર્મ ભરવા એકસાથે બંને પક્ષોના ઉમેદવાર પહોંચશે તો કાયદો અને વ્યવસ્થા જાળવવા માટે પણ પોલીસ તંત્રએ ભારે જેમ જ ઉઠાવવી પડશે.