મોરબીમાં 8.78 ઇંચ તો ટંકારામાં 7.64 ઇંચ વરસાદ, રાજ્યના 254 તાલુકામાં વરસાદની રમઝટ
Summarized by AI; it may make mistakes. Check important info
Summarized by AI; it may make mistakes. Check important info
Gujarat weather Updates : આજે શનિવારે 1 ઓગસ્ટના રોજ સવારે 6 કલાકથી રાત્રિના 10 કલાક સુધીમાં રાજ્યના 254 તાલુકામાં વરસાદ વરસ્યો છે. મોરબી જિલ્લાના મોરબી તાલુકામાં સૌથી વધુ 8.78 ઇંચ અને ટંકારામાં 7.64 ઇંચ વરસાદ ખાબક્યો છે. આ ઉપરાંત સુરેન્દ્રનગર જિલ્લાના ધ્રાંગધ્રામાં 6.93 ઇંચ, મોરબીના હળવદમાં 6.42 ઇંચ તેમજ વઢવાણમાં 6.18 ઇંચ વરસાદ નોંધાતા નીચાણવાળા વિસ્તારોમાં પાણી ભરાયા છે.
સવારે 6 થી બપોરે 4 વાગ્યા દરમિયાન રાજ્યમાં મેઘરાજાએ ધમાકેદાર બેટિંગ કરી હતી, જેમાં મોરબી જિલ્લો સૌથી વધુ પ્રભાવિત રહ્યો હતો, મોરબી તાલુકામાં સૌથી વધુ 8.31 ઇંચ (211 મિમી) વરસાદ ખાબક્યો હતો, જ્યારે તેના જ ટંકારા તાલુકામાં 6.73 ઇંચ, હળવદમાં 6.3 ઇંચ અને માળિયામાં 4.61 ઇંચ, મોરબી ઉપરાંત સુરેન્દ્રનગર જિલ્લામાં પણ મેઘરાજાએ જોરદાર હેત વરસાવ્યું હતું, જેમાં ધ્રાંગધ્રા તાલુકામાં 6.93 ઇંચ, વઢવાણમાં 6.18 ઇંચ, લખતરમાં 4.49 ઇંચ અને મુળીમાં 3.66 ઇંચ પાણી વરસી ચૂક્યું હતું. આ તરફ નર્મદા જિલ્લાના તિલકવાડા તાલુકામાં 4.17 ઇંચ અને ખેડા જિલ્લાના મહુધા તાલુકામાં 3.94 ઇંચ જેટલો વરસાદ નોંઘાયો છે.
સુરતમાં તાપી નદીના રૌદ્ર સ્વરૂપ વચ્ચે 240થી વધુનું સ્થળાંતર, મોટા વરાછામાં રસ્તો ધસી ગયો
સુરતના અબ્રામા, વેલંજા, અમરોલી, ઉમરા અને કઠોરના નીચાણવાળા વિસ્તારોમાંથી 240થી વધુ લોકોનું વેલંજા પ્રાથમિક શાળા ખાતે સ્થળાંતર કરાયું છે, જ્યાં ભોજન અને આરોગ્ય સુવિધા ઉપલબ્ધ કરાવાઈ છે. બીજી તરફ, મોટા વરાછા પાસે સવજી કોરાટ બ્રિજ નજીક તાપી રિવર સાઇડ રોડ 40 મીટર ધસી જતાં બેરિકેડિંગ કરી 300 જેટલાં વાહનોને વૈકલ્પિક માર્ગે ડાયવર્ટ કરાયા છે.
અમરેલી: ઠેબી ડેમનો એક દરવાજો ખોલાયો, કાંઠાના 4 ગામોને ઍલર્ટ
અમરેલી શહેર અને આસપાસના વિસ્તારોમાં ગત રાતથી વરસી રહેલા વરસાદને પગલે ઠેબી ડેમમાં પાણીની આવક વધી છે. ડેમની નિર્ધારિત સપાટી જાળવી રાખવા માટે તંત્ર દ્વારા ડેમનો એક દરવાજો 0.3 મીટર ખોલવામાં આવ્યો છે. પાણી છોડાતાં અમરેલી, પ્રતાપપરા, ફતેપુર અને ચાપાથળ ગામોને ઍલર્ટ કરી નદીપટમાં અવરજવર ન કરવા સૂચના અપાઈ છે.
તાપીના ઉકાઈ ડેમમાં પાણીની ભારે આવક, બે રાજ્યોથી પાણી છોડાયા
ગુજરાત અને મહારાષ્ટ્રમાં જામેલા વરસાદી માહોલ વચ્ચે ઉકાઈ ડેમના ઉપરવાસમાં આવેલા મહારાષ્ટ્રના ડેમોમાંથી મોટા પ્રમાણમાં પાણી છોડવામાં આવી રહ્યું છે. મધ્ય પ્રદેશ અને મહારાષ્ટ્રમાં પડી રહેલા ભારે વરસાદને કારણે હથનૂર ડેમના 41 દરવાજા ખોલીને અંદાજે 3 લાખ ક્યુસેક પાણી છોડાઈ રહ્યું છે. આ ઉપરાંત પ્રકાશા ડેમના પણ 4 દરવાજા પૂરેપૂરા અને 19 દરવાજા અડધા ખોલીને પાણી વહાવવામાં આવી રહ્યું છે. ઉપરવાસના બંને જળાશયોમાંથી સતત છોડાઈ રહેલા આ પ્રવાહને પગલે તાપી જિલ્લામાં આવેલા ઉકાઈ ડેમમાં પાણીની ભરપૂર નવી આવક નોંધાઈ રહી છે.
સુરતમાં 80 વ્યક્તિઓનું સફળ રેસ્ક્યૂ
ભારે વરસાદની પરિસ્થિતિ વચ્ચે સુરત મહાનગરપાલિકાની ફાયર ટીમ દ્વારા કીમ ખાતે 80 વ્યક્તિઓનું સફળ રેસ્ક્યૂ કરી તેમને સુરક્ષિત સ્થળે ખસેડવામાં આવ્યા
વઢવાણમાં નદીની સામે પાર ફસાયેલા ત્રણ સભ્યોનું રેસ્ક્યૂ
હાલમાં પડી રહેલા ભારે વરસાદના કારણે વઢવાણ તાલુકાના કેરાળા ગામે નદીની સામેની બાજુએ પાણીના પ્રવાહમાં એક પરિવાર ફસાયો હોવાની ઘટના સામે આવી હતી. અચાનક નદીમાં પાણીનું સ્તર વધી જતાં આ પરિવાર માટે જીવનું જોખમ ઊભું થયું હતું. પાણીની વચ્ચે ફસાયેલા લોકોમાં એક પુરુષ, એક સ્ત્રી અને એક નાના બાળકનો સમાવેશ થતો હતો, જેઓ બહાર નીકળવાનો કોઈ રસ્તો ન મળતાં ભારે મુશ્કેલીમાં મુકાયા હતા. ઘટનાની જાણ થતાં જ વઢવાણના પ્રાંત અધિકારી અને તેમની ટીમ તાત્કાલિક અસરથી ઘટનાસ્થળે દોડી ગઈ હતી. પરિસ્થિતિની ગંભીરતાને પારખીને જરા પણ સમય વેડફ્યા વિના ફાયર બ્રિગેડની ટીમ સાથે સઘન સંકલન સાધ્યું હતું. તંત્રની આ ટીમે ખરા અર્થમાં દેવદૂત બનીને યુદ્ધના ધોરણે રેસ્ક્યુ ઓપરેશન હાથ ધર્યું હતું. ટીમે ભારે જહેમત ઉઠાવી પાણીમાં ફસાયેલા ત્રણેય સભ્યો સુધી પહોંચી તેમને સહીસલામત રીતે બહાર કાઢ્યા હતા.
6 જિલ્લાઓમાં રેડ એલર્ટ, 27856 લોકોનું સુરક્ષિત સ્થળાંતર
વરસાદની વર્તમાન સ્થિતિ અને હવામાન વિભાગની ચેતવણીને પગલે રાજ્યના 6 જિલ્લાઓમાં (અમદાવાદ, સુરેન્દ્રનગર, રાજકોટ, ભાવનગર, મોરબી અને બોટાદ) રેડ એલર્ટ જાહેર કરવામાં આવ્યું છે. આ ઉપરાંત, બનાસકાંઠા, પાટણ, મહેસાણા, સાબરકાંઠા અને કચ્છ સહિતના અન્ય 13 જિલ્લાઓમાં ઓરેન્જ એલર્ટ આપવામાં આવ્યું છે. બચાવ અને રાહત કામગીરીને પહોંચી વળવા માટે વહીવટીતંત્ર દ્વારા 17 NDRF ની ટીમો, 33 SDRF ની પ્લાટુન અને 6 આર્મીની ટીમો વિવિધ સ્થળોએ તૈનાત કરવામાં આવી છે. વરસાદી પાણી ભરાવાને કારણે નીચાણવાળા વિસ્તારોમાંથી મોટા પાયે લોકોનું સ્થળાંતર કરવામાં આવ્યું છે. પ્રાપ્ત આંકડાઓ મુજબ, અત્યાર સુધીમાં કુલ 27856 લોકોને સુરક્ષિત સ્થળોએ ખસેડવામાં આવ્યા છે. જેમાં સૌથી વધુ નવસારી જિલ્લામાંથી 11590 અને સુરતમાંથી 11179 લોકોનું સ્થળાંતર કરાયું છે. આ ઉપરાંત, પૂરના પાણીમાં ફસાયેલા કુલ 53 લોકોને સફળતાપૂર્વક રેસ્ક્યુ કરવામાં આવ્યા છે, જેમાં છોટાઉદેપુરમાંથી સૌથી વધુ 31 લોકોને બચાવાયા છે.
ગુજરાતમાં ગઈકાલનો દિવસ એટલે કે 31 જુલાઈ 2026 ખૂબ જ ભારે વીત્યો. જેમાં રેડ એલર્ટની આગાહી વચ્ચે સૌથી વધુ વરસાદ સુરતના અંબિકામાં નોંધાયો હતો. જ્યાં શુક્રવાર સવારથી શરુ થઇને શનિવારની સવાર સુધીમાં 24.06 ઈંચ જેટલો મૂશળધાર વરસાદ નોંધાયો હતો. લગભગ 3 તાલુકા એવા હતા જ્યાં 16 ઈંચ કરતા વધુ વરસાદ નોંધાયો જ્યારે 9 તાલુકા એવા હતા જ્યાં 10 ઈંચ કરતા વધુ વરસાદ તૂટી પડ્યો હતો. જોકે આજે પણ ગુજરાતના અનેક જિલ્લામાં રેડ એલર્ટની આગાહી છે. ત્યારે સવારના બે કલાકમાં જ મેઘરાજાએ ધોધમાર બેટિંગ શરૂ કરી દીધી છે. સૌથી વધુ વરસાદની વાત કરીએ તો સુરત, તાપી, ખેડા, નવસારી, ભરુચ, વલસાડ, ડાંગ, આણંદ, નર્મદા જિલ્લાઓમાં નોંધાયો હતો.
