વેકેશન માણતા સુરતના શિક્ષકોના 'રંગમાં ભંગ', વસ્તી ગણતરીના આદેશને પગલે શિક્ષકોની હાલત કફોડી

Surat Teacher Forced to Return: સુરત નગર પ્રાથમિક શિક્ષણ સમિતિના શિક્ષકો માટે ચાલુ ઉનાળુ વેકેશન આફત સમાન સાબિત થયું છે. વસ્તી ગણતરી-2027ની કામગીરીના બહાને તંત્ર દ્વારા મંજૂર થયેલી રજાઓ રદ કરી તાત્કાલિક હાજર થવાનો આદેશ અપાતા શિક્ષણ જગતમાં ભારે રોષ અને અસંતોષ ફાટી નીકળ્યો છે.

મંજૂર રજાઓ કેન્સલ, હેડક્વાર્ટર ન છોડવા તાકીદ

શિક્ષણ સમિતિ દ્વારા બહાર પાડવામાં આવેલા કડક આદેશ મુજબ, વસ્તી ગણતરીની કામગીરીમાં રોકાયેલા તમામ શિક્ષકોની અગાઉથી મંજૂર થયેલી રજાઓ તાત્કાલિક અસરથી રદ કરવામાં આવી છે. આ સાથે જ કોઈપણ કર્મચારીએ પરવાનગી વગર હેડક્વાર્ટર (સુરત) છોડવું નહીં તેવી કડક સૂચના આપવામાં આવી છે. આ ઓચિંતા આદેશને કારણે હજારો શિક્ષકો મુશ્કેલીમાં મુકાયા છે.

પરિવાર સાથે પ્રવાસે ગયેલા શિક્ષકો ફસાયા

વર્ષભર શૈક્ષણિક અને બિન-શૈક્ષણિક કામગીરીમાં વ્યસ્ત રહેતા શિક્ષકો વેકેશન દરમિયાન પરિવાર સાથે સમય વિતાવવા માટે મહિનાઓ પહેલા બુકિંગ કરાવીને ફરવા નીકળ્યા છે. અનેક શિક્ષકો હાલ અન્ય રાજ્યોમાં કે વિદેશ પ્રવાસે છે, જ્યારે કેટલાંક પોતાના વતન ગયા છે. હવે અચાનક તાલીમમાં હાજર રહેવાના આદેશથી:

ટિકિટો અને હોટેલ બુકિંગ કેન્સલ કરાવતા મોટું આર્થિક નુકસાન વેઠવાનો વારો આવ્યો છે. પરિવાર સાથેના આયોજન પર પાણી ફરી વળતા શિક્ષકોમાં માનસિક સંતાપ જોવા મળી રહ્યો છે. દૂરના વિસ્તારોમાંથી તાત્કાલિક પરત ફરવા માટે મુસાફરીની વ્યવસ્થા કરવી પડકારજનક બની છે.

શિક્ષણ જગતમાં ઉગ્ર રોષ

શિક્ષકોનો આક્ષેપ છે કે સરકાર અને શિક્ષણ સમિતિ વચ્ચે સંકલનનો અભાવ છે. જો આ રાષ્ટ્રીય કામગીરીનું આયોજન અગાઉથી નક્કી હતું, તો વેકેશન શરૂ થયા બાદ જ શા માટે આદેશ આપવામાં આવ્યો? શિક્ષકોનું કહેવું છે કે વર્ષભર શિક્ષણ સિવાયની વિવિધ ઉજવણીઓ અને સરકારી કામોમાં તેઓ વ્યસ્ત રહે છે, અને હવે મળેલા આરામના દિવસોમાં પણ આયોજન વગરની જાહેરાતોથી તેમને પરેશાન કરવામાં આવી રહ્યા છે.

સંગઠનો રજૂઆત કરે તેવી શક્યતા

હાલમાં સુરત શિક્ષણ સમિતિમાં અસંતોષનો માહોલ ચરમસીમાએ છે. એક તરફ રાષ્ટ્રીય ફરજ હોવાથી હાજર થવું અનિવાર્ય છે, તો બીજી તરફ વ્યક્તિગત નુકસાન અને પારિવારિક આયોજન ખોરવાઈ ગયા છે. આ ગંભીર મુદ્દે આગામી દિવસોમાં શિક્ષક સંગઠનો સત્તાધીશો સમક્ષ ઉગ્ર રજૂઆત કરે તેવી પૂરેપૂરી શક્યતા છે.