સુરતના કુખ્યાત ચિરાગ ગોટીનું આત્મસમર્પણ, ડ્રગ્સ કેસનો વોન્ટેડ અનેક ગુનામાં છે આરોપી

Surat News: સુરત શહેરમાં છેલ્લા ઘણાં સમયથી નામચીન ચિરાગ ગોટીનો આતંક જોવા મળી રહ્યો છે. મિત્રની કારમાં ડ્રગ્સ મૂકવાના કેસથી માંડીને કરોડોની ઉઘરાણી, મારપીટ અને રિવોલ્વર બતાવી જાનથી મારી નાખવાની ધમકી સુધી અનેક આરોપો તેના પર લાગ્યા છે, ત્યારે ગુરુકુલ પાસેથી પકડાયેલા 70 ગ્રામ એમડી ડ્રગ્સના કેસમાં ચિરાગ ગોટીએ કોર્ટમાં સરન્ડર કરી દીધું છે. તે છેલ્લા 8 મહિનાથી વોન્ટેડ જાહેર થતાં નેપાળ ભાગી ગયો હતો. 

શું છે ડ્રગ્સ કેસ?

વાત છે આશરે 10 મહિના પહેલાની, સિંગણપોર પોલીસે વાહન ચેકિંગ દરમિયાન બાતમીના આધારે ઓઇલના વેપારી અલ્પેશ મિયાણીની 7.87 લાખ રૂપિયાના ડ્રગ્સ સાથે ધરપકડ કરી હતી. જેની તપાસમાં ખૂલ્યું હતું કે ભાગીદાર મિત્ર અલ્પેશ મિયાણી સાથે થયેલી રકઝક બાદ ચિરાગ ગોટી અદાવત રાખી અલ્પેશ મિયાણીની કારમાં ડ્રગ્સ મૂક્યું હતું. જેની બાતમી ચિરાગે જ પોલીસને આપી હતી. જેથી પોલીસે 7.87 લાખ રૂપિયાના ડ્રગ્સ સાથે અલ્પેશ મિયાણીને ઝડપી પાડ્યો હતો. પરંતુ પોલીસ તપાસમાં જ ચિરાગ ગોટીની શાતિર કરતૂતનો ભાંડો ફૂટી ગયો હતો. 

નેપાળ ભાગી ગયો હતો કુખ્યાત ચિરાગ ગોટી

પોલીસે કોર્ટમાં મિત્રની કારમાં ડ્રગ્સ પ્લાન કરનાર ચિરાગ ગોટી અને  ડ્રગ્સ વેચનાર મોહંમદ સફવાન મોહંમદ ઈશાક મેવાવાલા વિરુદ્ધ ચાર્જસીટ દાખલ કરી હતી. કારણ કે તપાસમાં ભાગીદાર ચિરાગ ગોટી, તેના ભાઈ નિરાંત અને પિતા ઘનશ્યામ ગોટીની કરતૂતના પૂરતા પુરાવા મળ્યા હતા.  ફરિયાદ નોંધાતા તે પોલીસથી બચવા સતત સ્થળ બદલતો હતો અને નેપાળ ભાગી જઈ અલગ અલગ હોટલમાં રોકતો હતો. ત્યારે હવે સુરતની કોર્ટમાં સરન્ડર થતાં પોલીસે આગળની કાર્યવાહી હાથ ધરી છે.

આ પણ વાંચો: ભાવનગર: સસ્પેન્ડેડ મહિલા કોન્સ્ટેબલ નયના બારૈયાનો આપઘાતનો પ્રયાસ, DySP રીમા ઝાલા સામે ગંભીર આક્ષેપો

SCએ ભાઈ નિરાંતને જામીનમાં મુદ્દત, ચિરાગને સરન્ડર કરવાનો આપ્યો હતો નિર્દેશ

ફરિયાદ બાદ ચિરાગ ગોટી અને તેના ભાઈ નિરાંતેએ આગોતરા જામીન મેળવવા ધમપછાડા કર્યા હતા. સુરતની સેશન્સ કોર્ટએ જામીન ફગાવી દેતા ગુજરાત હાઈકોર્ટમાં જામીન માગ્યા હતા. પરંતુ ત્યાં પણ આગોતરા જામીન ન મળતા સુપ્રીમ કોર્ટના દરવાજા ખખડાવ્યા હતા. જેની સુનાવણીમાં સુપ્રીમ કોર્ટે નોંધ્યું હતું કે મુખ્ય સૂત્રધાર  ચિરાગ આઠ મહિનાથી વોન્ટેડ છે ને ભાગતો ફરે છે. બંને પક્ષની દલીલ બાદ  કોર્ટે નિરાંતની જામીન અરજીમાં મુદત આપી ચિરાગને બે અઠવાડિયામાં સરન્ડર થવા નિર્દેશ આપ્યો હતો. સુપ્રીમ કોર્ટના આદેશ બાદ ચિરાગ ગોટી સુરતની કોર્ટમાં સરન્ડર થયો હતો જે બાદમાં કોર્ટે તેનો કબજો પોલીસને આપ્યો છે.