Sardar Patel Sports Enclave : કોમનવેલ્થ તથા વર્લ્ડ પોલીસ એન્ડ ફાયર ગેમ્સનું આયોજન ગુજરાતમાં થવાનું છે. એવામાં અમદાવાદ શહેરમાં નરેન્દ્ર મોદી સ્ટેડિયમની આસપાસ સરદાર પટેલ સ્પોર્ટ્સ એન્ક્લેવનો માસ્ટર પ્લાન તૈયાર કરવામાં આવ્યો છે. આ સ્પોર્ટ્સ એન્ક્લેવ 350 એકરમાં ફેલાયેલું હશે જેમાં ઇન્ટરનેશનલ ટેનિસ સેન્ટર, ઇન્ડોર એરેના, એક્વેટિક સેન્ટર, નેશનલ ઇન્સ્ટિટ્યૂટ ઓફ સ્પોર્ટ્સ એક્સેલન્સનું નિર્માણ કરવામાં આવશે. BDP, કોક્સ આર્કિટેક્ચર અને કોલાજ ડિઝાઇનના કન્સોર્ટિયમ સ્પોર્ટ્સ એન્ક્લેવના માસ્ટર પ્લાનની ડિઝાઈન તૈયાર કરવામાં આવી છે.
ઇન્ટરનેશનલ ટેનિસ સેન્ટર
ભારતમાં આ લેવલનું પહેલું ટેનિસ સેન્ટર અમદાવાદમાં બનાવાશે. જેમાં 10 હજાર સીટનું સેન્ટર કોર્ટ તથા 5 હજાર અને 3 હજાર સીટના શૉ કોર્ટ્સ હશે. ટેનિસ સેન્ટરમાં કુદરતી છાંયડો જળવાઈ તે રીતે ફ્લોટિંગ ફેબ્રિકની છત તૈયાર કરાશે. આ ટેનિસ સેન્ટર ટેનિસ ક્લબમાં પણ પરિવર્તિત થશે, જેમાં ઇન્ડોર-આઉટડોર કોર્ટ્સ અને હોસ્પિટાલિટી સુવિધાઓ હશે.
ખેલાડીઓની ટ્રેનિંગ માટે નેશનલ ઇન્સ્ટિટ્યૂટ ઓફ સ્પોર્ટ્સ એક્સેલન્સ: NISE
ટેનિસ સેન્ટર અને મોદી સ્ટેડિયમની વચ્ચે સ્થિત આ સંકુલ 'સ્પોર્ટિંગ આશ્રમ' તરીકે ઓળખાશે. અહીં સ્પોર્ટ્સ જગતના ભાવિ સ્ટાર્સ માટે તાલીમ અને મેડિકલ સુવિધાઓ ઊભી કરાશે. અહીં ટ્રેનિંગ હોલ, જીમ્નેશિયમ, રિકવરી ઇક્વિપમેન્ટ્સ તથા બાયો-મેડિકલ સુવિધાઓ પણ ખેલાડીઓને આપવામાં આવશે.
ભારતનું સૌથી મોટું ઇન્ડોર એરેના
સરદાર પટેલ સ્પોર્ટ્સ એન્ક્લેવના પૂર્વ છેડે ભારતનું સૌથી મોટું ઇન્ડોર એરેના બનાવવામાં આવશે. અહીં એકસાથે 18 હજાર લોકો બેસી શકશે. જ્યાં જિમ્નાસ્ટિક્સ, બાસ્કેટબોલ અને કબડ્ડી રમાશે તથા કોન્સર્ટ પણ કરી શકાશે. ઇન્ડોર એરેનાની ડિઝાઇન પરંપરાગત ઝરોખા અને છજ્જાથી પ્રેરિત છે.
ઈન્ટરનેશનલ સ્વિમિંગ ટુર્નામેન્ટ યોજી શકાય તેવું એક્વેટિક સેન્ટર
પશ્ચિમ છેડે અને નરેન્દ્ર મોદી સ્ટેડિયમની બાજુમાં નવું એક્વેટિક સેન્ટર નિર્માણ પામશે. અહીં મોટી ટુર્નામેન્ટ યોજાય ત્યારે 12 હજાર પ્રેક્ષકો એકસાથે બેસી શકશે. અહીં સ્વિમિંગ, ડાઈવિંગ અને સિંક્રનાઇઝ્ડ સ્વિમિંગની આંતરરાષ્ટ્રીય સ્તરની ટુર્નામેન્ટ યોજી શકાય તેવી ડિઝાઇન તૈયાર કરવામાં આવી છે. એક્વેટિક સેન્ટરની ડિઝાઈન દિવાળીમાં સાબરમતી નદીમાં તરતા લાલટેન જેવી કરવામાં આવી છે.
સાબરમતી રિવરફ્રન્ટ પર ગેમ પ્લાઝા, શહેરીજનો પણ મજા માણી શકશે
સાબરમતી રિવરફ્રન્ટને જ સેન્ટ્રલ ગેમ્સ પ્લાઝામાં ફેરવવામાં આવશે. જેથી અહીં રમત-ગમતની મેગા ઈવેન્ટ યોજી શકાય તથા તે પછી આખું વર્ષ ડાઈનિંગ, કોમ્યુનિટી સ્પોર્ટ્સ કોર્ટ્સ અને અર્બન પાર્ક તરીકે શહેરના લોકો પણ તેનો ઉપયોગ કરી શકશે. બાયોડાયવર્સ પાર્ક અમદાવાદના 'ફેફસાં'નું કામ કરશે.
કોમનવેલ્થ ગેમ્સ અમદાવાદમાં યોજાવવાની હોવાથી એક અનુમાન અનુસાર શહેરમાં હોસ્પિટાલિટી અને રિટેલ સેક્ટરમાં 20 હજારથી વધુ નોકરીઓનું સર્જન થશે. સરદાર પટેલ સ્પોર્ટ્સ એન્ક્લેવના માસ્ટર પ્લાનની ડિઝાઈનમાં ચાર મુખ્ય સિદ્ધાંતો છે. આબોહવા પ્રત્યે પ્રતિભાવ, પ્રકૃતિ સાથે જોડાણ, આધુનિક આર્કિટેક્ચર અને ટકાઉ વારસો. નરેન્દ્ર મોદી સ્ટેડિયમની આસપાસ પ્લાઝા અને ગાર્ડન બનાવાશે. સ્પોર્ટ્સ એન્ક્લેવમાં હરિયાળી પણ જળવાય તેનું ખાસ ધ્યાન રાખવામાં આવશે.
