વડોદરાઃ વડોદરા કોર્પોરેશન હસ્તકના ફાયર બ્રિગેડના કોન્ટ્રાક્ટ પરના કર્મચારીઓનો પગાર ફરી એક વાર અટવાતાં ભારે નારાજગી વ્યાપી છે.
રાત-દિવસ ઇમરજન્સી સેવા બજાવતા કોર્પોરેશનના કોન્ટ્રાક્ટના કર્મચારીઓમાં ૧૯ કર્મચારીઓ તો એવા છે કે જેઓ વર્ષોથી ફરજ બજાવી રહ્યા છે,પરંતુ તેમને કાયમી કરવામાં આવતા નથી.જ્યારે બીજા કોન્ટ્રાક્ટના કર્મચારીઓને પણ દર મહિને પગાર માટે વલખાં મારવા પડે છે.
વારંવાર રજૂઆતો કરવા છતાં કર્મચારીઓને ન્યાય મળતો નહિ હોવાથી ગયા મહિને તેમણે હડતાળનું શસ્ત્ર પણ ઉગામ્યું હતું.ત્યાર બાદ કલાકોમાં જ સમાધાન થઇ ગયું હતું અને પગાર થયો હતો.ફાયર બ્રિગેડના અધિકારીએ તેમને હડતાળ નહિ પાડવા માટે સમજાવ્યા હતા.
હંગામી કર્મચારીઓએ કહ્યું છે કે,અમારા બાળકોની સ્કૂલ ફી તેમજ શૈક્ષણિક ખર્ચનો સમય આવ્યો છે તેવા સમયે અમે ખાતરી આપી હોવાથી હડતાળનું શસ્ત્ર ઉપાડવા માગતા નથી,પરંતુ મહિનો પુરો થવા આવ્યો હોવા છતાં હજી પગારના કોઇ એંધાણ નથી કે કોઇ સરખો જવાબ મળતો નથી.જેથી મ્યુ. કમિશનર સહિતના અધિકારીઓ કાયમી ઉકેલ લાવે તેવી અમારી લાગણી છે.
