થલતેજ સ્થિત ગેસ્ટ હાઉસમાં ચાર શખ્સોએ વહેલી પરોઢે લૂંટ ચલાવી

અમદાવાદ,સોમવાર

થલતેજ ભાઇકાકાનગરમાં આવેલા એક ગેસ્ટ હાઉસમાં રહેવા માટે રૂમ જોવાનું કહીને આવેલા ચાર શખ્સોએ કર્મચારીઓને છરી બતાવીને રોકડ, મોબાઇલ ફોન સહિતની મત્તાની લૂંટ કરી હોવાની ઘટના સામે આવી છે. આ અંગે બોડકદેવ પોલીસે સીસીટીવી ફુટેજના આધારે તપાસ શરૂ કરી છે.

ઘાટલોડિયા  વર્ધમાન ફ્લેટમાં રહેતા મુલસિંગ પુરોહિત થલતેજ ભાઇકાકાનગર બસ સ્ટેશન પાસે સહજાનંદ કોમ્પ્લેક્સ હોટલની માલિકી ધરાવે છે. તેમની હોટલમાં મેનેજર ગીરીરાજ મીણા અને દેવીલાલ પટેલ રવિવારે રાતના નોકરી પર હતા. ત્યારે વહેલી પરોઢે ચાર વાગ્યાના સુમારે બે માણસો આવ્યા હતા અને તેમણે ભાડુ પુછીને રૂમ રાખવાનું કહેતા મેેનેજરને રૂમ જોવા માટે લઇ ગયા હતા. ત્યારે બંને જણાએ મેનેજરને છરી બતાવીને પકડી રાખીને રોકડ ક્યાં છે? તેમ  કહીને મારવાની ધમકી આપી હતી.

આ દરમિયાન અન્ય એક વ્યક્તિ આવ્યો હતો અને તેણે કાઉન્ટર પરથી ચાવી લઇને લોકરમાંથી તેમજ ડેઅરમાંથી ૭૪ હજારની રોકડની તેમજ ટીવી, મોનીટર અને મોબાઇલ ફોનની લૂંટ કરી હતી.  મુલસિંગે મોબાઇલ ફોન પરના સીસીટીવીમાં તપાસ કરતા કુલ ચાર શખ્સો લૂંટ કરીને જતા જણાયા હતા. આ અંગે બોડકદેવ પોલીસ સ્ટેશનના પીઆઇ  એસ જી ખાંભલાએ જણાવ્યું કે સીસીટીવી ફુટેજના આધારે આરોપીઓની ઓળખ કરીને કેટલીક કડીઓ મેળવીને અલગ અલગ ટીમ દ્વારા તેમને ઝડપી લેવા તજવીજ હાથ ધરી છે.