Vadodara Corporation : વડોદરા મ્યુનિસિપલ કોર્પોરેશનની 2026ની ચૂંટણીમાં વોર્ડ નંબર 14માં ચોંકાવનારો ઉલટફેર જોવા મળ્યો છે. વર્ષ 2021માં જ્યાં ભાજપે પેનલ વિજય સાથે દબદબો જમાવ્યો હતો, ત્યાં આ વખતે પેનલ તૂટી ગઈ છે અને ભાજપ તથા કોંગ્રેસ વચ્ચે બે-બે બેઠકો વહેંચાઈ છે.
કોંગ્રેસે આ વખતેજોરદાર એન્ટ્રી કરી પોતાનું ખાતું ખોલાવ્યું છે. કોંગ્રેસના દીપાબેન શ્રીવાસ્તવે 15,423 મત મેળવી જીત નોંધાવી છે, જ્યારે તીર્થ બ્રહ્મભટ્ટે 16,070 મત સાથે વિજય મેળવ્યો છે. નોંધનીય છે કે, દીપાબેન શ્રીવાસ્તવ પૂર્વ ધારાસભ્ય મધુ શ્રીવાસ્તવની પુત્રી છે, જે રાજકીય રીતે મહત્વપૂર્ણ ગણાય છે. બીજી તરફ ભાજપના દીપિકાબેન પટણીને 16,249 મત મળ્યા છે અને અંકિતાબેન સોનીએ સૌથી વધુ 17,814 મત મેળવી જીત મેળવી છે.
પરાજિત ઉમેદવારોની વાત કરીએ તો કોંગ્રેસના મોહમ્મદ જાવીદ ધૂપેલવાલાને 14,160 મત અને હેમાંગીની કોલેકરને 10,077 મત મળ્યા છે. જ્યારે ભાજપના વિશાલ કાયસ્થને 15,367 મત અને સંતોષ ગરુડને 15,290 મત મળ્યા હોવા છતાં હારનો સામનો કરવો પડ્યો છે. આ પરિણામો પરથી સ્પષ્ટ થાય છે કે વોર્ડ નં. 14માં મતદારોનો મિજાજ બદલાયો છે.
