Vadodara : ભાજપના ઉપપ્રમુખ દ્વારા જ વોર્ડ નંબર 5 ના અન્ય ઉપપ્રમુખને ગાળો આપી જાનથી મારી નાખવાની ધમકી આપવામાં આવી હતી. આ બનાવ બાદ આજે ધમકી આપનાર ઉપપ્રમુખ સામે વધુ એક મારામારીની ફરિયાદ બાપોદ પોલીસ મથકે નોંધાઈ છે.
વોર્ડ નંબર 5 ના ઉપપ્રમુખ અક્ષય સુથારે ભાજપના ઉપપ્રમુખ કરસન રબારી સામે અરજી આપી હતી. જેમાં તેમણે આક્ષેપ કર્યો હતો કે, કરસન રબારી માથાભારે સ્વભાવના છે અને રાજકીય દ્વેષભાવ રાખીને સતત ગાળો આપી ધમકી આપી રહ્યા છે.
બીજી તરફ, વાઘોડિયા રોડ સ્થિત હીરાબાનગર ક્રિકેટ ગ્રાઉન્ડમાં ચાલી રહેલી ક્રિકેટ ટુર્નામેન્ટ દરમિયાન વિવાદે હિંસક રૂપ ધારણ કર્યું હતું. ચિરાગ સહારે ફરિયાદમાં જણાવ્યું કે, કરસન રબારીએ લોખંડની પાઇપ વડે માથામાં ફટકો માર્યો હતો. ઉપરાંત હર્ષદ ભરવાડ અને રીતુ શર્મા દ્વારા અન્ય લોકોને પણ માર મારવામાં આવ્યો હતો. આ ઘટનામાં કુલ 6 યુવકો ઈજાગ્રસ્ત થયા હોવાનું સામે આવ્યું છે.
જ્યારે સામા પક્ષે આયોજક હર્ષદ ભરવાડએ સિટી પોલીસ સ્ટેશનમાં નોંધાવેલી ફરિયાદમાં જણાવ્યું છે કે, સયાજી હોસ્પિટલ તરફ જતા સમયે માંડવી વિસ્તારમાં અગાઉના ઝઘડાની અદાવત રાખી શિવમ કહાર, હર્ષ કહાર સહિત અન્ય લોકોએ સાયકલની ચેન અને ડંડા વડે હુમલો કર્યો હતો. આ સમગ્ર બનાવને લઈને રાજકીય વર્તુળોમાં ચર્ચાનો વિષય બન્યો છે.
