વડોદરાના મકરપુરામાં નવો બનાવેલો રસ્તો માત્ર 24 કલાકમાં ખોદી નંખાતા લોકોમાં રોષ

image : AI Photo 

Vadodara : ગેસની પાઈપલાઈન કે પછી કોઈપણ કેબલને ચેક કર્યા વગર રોડ-રસ્તા બનાવાતા હોવાનો આક્ષેપો કરીને લોકોએ ટેક્સના નાણાનો વેડફાટ થતો હોવાનું સ્થાનિકોએ આક્ષેપ સાથે રોષ વ્યક્ત કર્યો હતો.

મુખ્યમંત્રીએ વારંવાર વહિવટી તંત્રને તાકીદ કરી છે કે રસ્તા બનાવતા પહેલા કેબલિંગ, ગેસ, ગટર તથા પીવાના પાણીની પાઈપલાઈનનું સ્ટેટસ ચેક કરી લેવા જોઈએ. પરંતુ વડોદરા કોર્પોરેશનના અધિકારીઓને આ વાત ગળે ઉતરતી નથી કે ગળે ઉતારવા માંગતા નથી. પોતાના માનીતા કોન્ટ્રાક્ટરોને લાભ પહોંચાડવા અધિકારીઓ પહેલા રસ્તો બનાવી દે છે અને પછી ત્યાં જ કોન્ટ્રાક્ટરનું બીજું બિલ પાસ કરાવવા માટે ખોદકામ કરાવી દે છે.

મકરપુરા વિસ્તારમાં નોવિનો સોસાયટી રોડ પર જોવા મળ્યું છે. આ વિસ્તારમાં નવો રોડ બનાવવાને માંડ 24 કલાક થયા છે ત્યાં રસ્તાની વચ્ચે જ કોઈક કારણોસર નવું ખોદકામ કરી દેવાયું છે અને તેના કારણે સ્થાનિક લોકોમાં આક્રોશ ભભૂકી ઉઠ્યો છે. નવો સારો રોડ બનાવ્યા પછી કોર્પોરેશનને યાદ આવે છે કે હજી કોઈ કામ કરવાનું બાકી હતું અને તેના કારણે અધિકારીઓ ભ્રષ્ટ કોન્ટ્રાક્ટરોને લાભ અપાવી રહ્યા હોવાના આરોપો લાગી રહ્યા છે. ખરેખર તો રસ્તો બનતા પહેલા જ આ કામ થઈ જવું જોઈતું હતું. સ્થાનિક રહિશોએ સોશિયલ મીડિયા સમક્ષ રોષ વ્યક્ત કરતાં જણાવ્યું હતું કે મકરપુરામાં નોવિનો સોસાયટી રોડ નવો બનાવાયો છે. ત્યારબાદ માત્ર 24 કલાક પણ થયા નથી ત્યાં આ રોડને ફરી ખોદી કાઢવામાં આવ્યો છે. આ બધી ટ્રિક કોન્ટ્રાક્ટરો અને ભ્રષ્ટ અધિકારીઓને કમાવા માટેની છે. રહિશોએ કહ્યું કે, જે રોડ-રસ્તાને નવો બનાવ્યાને 24 કલાક પણ પુરા થયા નથી ત્યાં જ ફરી ખોદકામ શરૂ કરી દીધું છે.

સામાન્ય અધિકારી તો પહેલાં જ સમારકામ કરાવી દે, વાયરનું કામ કરાવી દે અને ગેસનું કામ પણ કરાવી દે, પરંતુ અહીં તો રસ્તો બન્યા પછી યાદ આવે છે કે પાઈપો નાખવાની બાકી છે, પછી વાયર નાખવાના હતા અને પછી ગટર લાઈન નાખવાની યાદ આવે છે. આવી રમત રોજ ચાલે છે. આવા લોકોના કારણે વડોદરાનું નામ હવે ‘ખાડોદરા’ થયું છે.