વડોદરાઃ એમ.એસ.યુનિવર્સિટીની આર્ટસ ફેકલ્ટીના જર્મન વિભાગમાં બીએ વિથ જર્મન ભાષાના કોર્સ માટે એન્ટ્રન્સ ટેસ્ટ લેવાનું શરુ કરાયા બાદ આ વિભાગને ભવિષ્યમાં તાળા મારવા પડે તેવી સ્થિતિ સર્જાઈ છે.
મળતી વિગતો પ્રમાણે આ કોર્સમાં ૩૦ બેઠકો છે અને આ વર્ષે ૧ જ વિદ્યાર્થીને પ્રવેશ અપાયો છે.ગત વર્ષે પણ માત્ર બે જ વિદ્યાર્થીઓ ટેસ્ટ બાદ પ્રવેશ મેળવી શક્યા હતા.જર્મન ભાષા જાણનારાઓની એક તરફ માગ વધી રહી છે ત્યારે એન્ટ્રન્સ ટેસ્ટનો નિયમ આ વિભાગમાં વિદ્યાર્થીઓની સંખ્યામાં ઘટાડો કરી રહ્યો છે.
વિદ્યાર્થીઓએ એન્ટ્રન્સ ટેસ્ટની જગ્યાએ અગાઉની જેમ વિદ્યાર્થીઓનું મેરિટ અને સ્ક્રિનિંગ કરીને પ્રવેશ આપવા માટે ફેકલ્ટી ડીન સમક્ષ રજૂઆત કરી છે.વિદ્યાર્થીઓનું કહેવું છે કે, ટેસ્ટના આકરા ધારા ધોરણોના કારણે જર્મન ભાષા શીખવા માગતા વિદ્યાર્થીઓ ટેસ્ટ પાસ કરી શકતા નથી અને પ્રવેશથી વંચિત રહી જાય છે તો બીજી તરફ વિભાગને વિદ્યાર્થીઓ મળતા નથી.
ઉલ્લેખનીય છે કે, બે વર્ષ પહેલા જર્મન વિભાગમાં ભણાવવાના મુદ્દે ઉહાપોહ થયો હતો અને પ્રવેશ આપવા પર સવાલો ઉઠયા હતા અને એ પછી એન્ટ્રન્સ ટેસ્ટથી પ્રવેશનો નિયમ લાગુ કરાયો હતો.
