કલ્યાણપુરમાં ક્રાઇમ બ્રાંચે મહાઠગને પકડયો : પોલીસે અલગ-અલગ 12 બોગસ ડ્રાઇવીંગ લાયસન્સ, : રૂ. 5,000 રોકડા, ટુ-વ્હીલર સહિતનો મુદ્દામાલ કબજે
જામ ખંભાળિયા, : કલ્યાણપુરમાં અલગ-અલગ વિસ્તારના લોકોને આરટીઓનો એજન્ટ તરીકે કામ કરતો હોવાની ઓળખ આપી 400 લોકોને બોગસ ડ્રાઇવીંગ લાયસન્સ કાઢી આપી છેતરપિંડી આચરનાર શખ્સને એસઓજીની ટીમે પકડી લીધો હતો.
કલ્યાણપુર તથા આસપાસના ગ્રામ્ય વિસ્તારના લોકોને એક શખ્સ આરટીઓમાં એજન્ટ હોવાની ખોટી ઓળખ આપી જાળમાં ફસાવી બોગસ ડ્રાઇવીંગ લાયસન્સ કાઢી છેતરપિંડી આચરતો હોવાની માહિતી મળતા એસઓજીની ટીમે કલ્યાણપુરમાં સરકારી હોસ્પિટલની સામે રહેતો કિશન નટવરલાલ ઉર્ફે નટુભાઇ સોમૈયા (ઉ.વ. 25)ને પકડી લીધો હતો. રેડ દરમિયાન પોલીસે તેની પાસેથી અલગ-અલગ 12 બોગસ ડ્રાઇવીંગ લાયસન્સ, રૂ. 5200 રોકડા તથા મોબાઇલ ટુ-વ્હીલર મળી રૂ. 35,200 નો મુદ્દામાલ કબજે કરી કલ્યાણપુર પોલીસ મથકમાં ગુનો દાખલ કરાવ્યો હતો.
પોલીસની પુછપરછમાં આરોપી પોસ્ટ ઓફીસને લગતી કામગીરી કરતો હોવાથી અલગ-અલગ વિસ્તારોના લોકો સાથે મુલાકાત થતી ત્યારે તે પોતે આરટીઓમાં એજન્ટ તરીકે કામ કરતો હોવાની વાતો કરી લોકોને ફસાવતો હતો અને એક લાયસન્સના રૂ. 3000થી રૂ. 8000 સુધી રોકડા તથા ઓનલાઇન લઇ લેતો હતો અને ગ્રાહકને આરટીઓમાં ટ્રાયલ આપ્યા વગર ઓરીજનલ ડ્રાઇવીંગ લાયસન્સ ઘરબેઠા મળી જશે, તેવા ખોટા વાયદાઓ કરી તે મોબાઇલ ફોનમાં અન્ય વ્યક્તિના લાયસન્સનો ફોટો પાડી તેમાં એડીટીંગ કરી તેની પ્રીન્ટ કાઢીને લેમીનેશન કરાવીને આપતો હતો. તેણે બે વર્ષ દરમિયાન આશરે 300 થી 400 લોકોના લર્નિંગ અને પાકા ડ્રાઇવીંગ લાયસન્સ કાઢી આપી છેતરપિંડી આચરી હોવાનું જાણવા મળ્યું છે. આ મામલે પોલીસે તેની ધરપકડ કરી તેના બે દિવસના રિમાન્ડ મેળવી વધુ તપાસ હાથ ધરી છે.
