Jamnagar News: જામનગર જિલ્લામાં ગેરકાયદેસર પ્રવૃત્તિઓ અને ખનીજ ચોરી સામે કડક ઝુંબેશના ભાગરૂપે લાલપુર તાલુકાના બાબરીયા ગામ ખાતે એક મોટી કાર્યવાહી કરવામાં આવી છે. જામનગર SOG (સ્પેશિયલ ઓપરેશન ગ્રુપ) દ્વારા પાડવામાં આવેલા દરોડામાં મંજૂર લીઝ વિસ્તારની બહાર ગેરકાયદેસર રીતે પથ્થરનું ખનન કરતા એક ઈસમ સામે એક્શન લેવાયા છે. ઘટનાસ્થળેથી પથ્થર કાઢવાના 3 મશીન કબ્જે કરી આશરે 8,00,000 રૂપિયાનો દંડ વસુલવાની પ્રક્રિયા શરૂ કરવામાં આવી છે.
લીઝ વિસ્તારની બહાર ચાલતું હતું ગેરકાયદેસર ખોદકામ
રાજકોટ SOG દ્વારા સ્ટાફ ગ્રામ્ય વિસ્તારમાં પેટ્રોલિંગમાં હતો. SOG ને ચોક્કસ બાતમી મળી હતી કે, બાબરીયા ગામે નુરમામદ મુંગર અલારખા સમા દ્વારા પોતાની મંજૂર થયેલી પથ્થરની લીઝની બહાર જઈને ગેરકાયદેસર રીતે મોટું ખનન કરવામાં આવી રહ્યું છે. બાતમી મળતા જ SOG ખાણ-ખનીજ વિભાગ તથા લાલપુર પોલીસ સ્ટેશનના સ્ટાફને સાથે રાખીને સ્થળ પર ત્રાટકી હતી.
3 મશીનો કબ્જે, 8 લાખ રૂપિયાના દંડની કાર્યવાહી
તપાસ દરમિયાન બાતમી સાચી સાબિત થઈ હતી અને આરોપી સરકારી નિયમોનો ભંગ કરીને લીઝ એરિયા સિવાયની જગ્યામાંથી પથ્થરો કાઢતો પકડાયો હતો. પોલીસ અને ખાણ-ખનીજ વિભાગે પથ્થર કાઢવાના 3 મશીન (ચકરડી) કબ્જે લીધા છે, જેની કુલ કિંમત 75,000 રૂપિયા આંકવામાં આવી છે. મંજૂર વિસ્તારની બહાર કેટલા મોટા પ્રમાણમાં અને કેટલા ઊંડા ખાડા પાડીને ગેરકાયદેસર ખોદકામ કરવામાં આવ્યું છે તેની વૈજ્ઞાનિક માપણી શરૂ કરી દેવાઈ છે. પ્રાથમિક અંદાજ મુજબ, આ ખનીજ ચોરી બદલ આરોપી પાસેથી આશરે 8,00,000 રૂપિયાનો દંડ વસુલ કરવાની કાનૂની કાર્યવાહી હાથ ધરવામાં આવી છે.
