જામનગરમાં વધુ એક બુટલેગર સામે 'પાસા' હેઠળ કાર્યવાહી હાથ ધરાઈ

Jamnagar Police : જામનગર જિલ્લામાં કાયદો અને વ્યવસ્થાની પરિસ્થિતિ જળવાઈ રહે તેમજ અસામાજિક પ્રવૃત્તિઓમાં સંકળાયેલા તત્વો સામે કડક કાર્યવાહી કરવા માટે રાજકોટ રેન્જના આઈજીપી નિર્લીપ્ત રાય અને જામનગર જિલ્લા પોલીસ વડા ડો.રવિ મોહન સૈની દ્વારા સૂચનાઓ આપવામાં આવી હતી.

આ સૂચનાઓના અનુસંધાને એલસીબીના પીઆઈ તેમજ સિટી-સી ડિવિઝન પોલીસ સ્ટેશનના પીઆઈ અને તેમની ટીમ દ્વારા પ્રોહિબિશન સંબંધિત ગુનાહિત પ્રવૃત્તિઓમાં સંકળાયેલા ઇસમો અંગે માહિતી એકત્રિત કરી પાસા હેઠળની દરખાસ્ત તૈયાર કરવામાં આવી હતી.

પોલીસ અધિક્ષક મારફતે દરખાસ્ત જિલ્લા મેજિસ્ટ્રેટ પી.બી. પંડયા સમક્ષ મોકલવામાં આવતા તેમણે જામનગરના વલનવેલ વિસ્તારમાં રહેતા દારૂના એક ધંધાર્થી સામે પાસા વોરંટ જારી કર્યો હતો. ત્યારબાદ પોલીસ સબ ઇન્સ્પેક્ટર અને તેમની ટીમે વોરંટની સફળ બજવણી કરી હતી.

પાસા હેઠળ અટકાયત કરાયેલ શખ્સની ઓળખ કાયાભાઈ કરશનભાઈ સાખરા, રહે. ડિફેન્સ કોલોની, વુલન મિલ પાછળ, જામનગર તરીકે થઈ છે. કાયાભાઈ સામે અગાઉથી પ્રોહિબિશન સંબંધિત ગુનાઓ નોંધાયેલા હોવાનું પોલીસ સૂત્રોએ જણાવ્યું છે. પાસા વોરંટની અમલવારી બાદ આરોપીને સુરત સ્થિત લાજપોર સેન્ટ્રલ જેલ ખાતે મોકલવાની તજવીજ હાથ ધરવામાં આવી હતી.