વડોદરા, તા.9 વડોદરા જિલ્લામાં ડેસર, સાવલી, મંજુસર, છાણી અને જામ્બુવાના વિવિધ ગામડાઓમાં આજે ગુજરાત ઊર્જા વિકાસ નિગમ કંપની અને મધ્ય ગુજરાત વીજ કંપનીના અધિકારીઓ દ્વારા ૧૭૩૧ જોડાણોનું વીજ ચેકિંગ કરતા ૧૧૭ જેટલા વીજ ચોરીના જોડાણો મળ્યા હતાં, રૃ. ૨૭.૧૮ લાખની વીજ ચોરી પકડી પાડી દંડ વસૂલવાની કાર્યવાહી હાથ ધરાઈ છે.
મધ્ય ગુજરાત વીજ કંપનીના પાંચ સબ ડિવિઝનના ગામોમાં ૫૫ જેટલી ટીમો બનાવી એમ.જી.વી.સી.એલ.ના અધિકારીઓ અને પોલીસ સાથે સામૂહિક રીતે આકસ્મિક વીજ ચેકિંગ હાથ ધરવામાં આવ્યું હતું. આ ચેકિંગમાં સબ ડિવિઝન ડેસરના સાંઢાસાલ, વેજપુર અને પ્રતાપપુરા જેજીવાય ફીડરોના ગામ, સાવલી સબ ડિવિઝનના ગોઠડા જેજીવાય ફીડરમાં આવતા વિસ્તારોના ગામો, મંજુસર સબ ડિવિઝનના ટુંડાવ, મોટા મોતીપુરા, રાણીયા ફીડરોના ગામો, છાણી સબ ડિવિઝનના જિયા અને આમલીયારા ફીડરોના વિસ્તારના ગામો, તેમજ જામ્બુવા સબ ડિવિઝનના ધનિયાવી ફીડરના ગામો ચકાસાયા હતાં.
ચેકિંગ દરમિયાન ૨૫ ગામોમાં ૧૭૩૧ જેટલા વીજ જોડાણોનું ચેકિંગ કરવામાં આવ્યું હતું, જેમાંથી ૧૧૭ જેટલા વીજ ચોરીના જોડાણોને ઝડપી લેવામાં આવ્યા હતા અને અંદાજે રૃા.૨૭.૧૮ લાખની વીજ ચોરી ઝડપાઈ હોવાનું સામે આવ્યું છે. વીજ ચોરી કરતા લોકો સામે કડક કાર્યવાહી કરવામાં આવતા ફફડાટ વ્યાપી ગયો છે.
