વડોદરામાં અલકાપુરી ગરનાળામાં પોલીસ બસ ફસાતા બંને તરફ ભારે ટ્રાફિક જામ

Vadodara : વડોદરાના અલકાપુરીથી રેલવે સ્ટેશન તરફ અને સયાજીગંજથી સર્કિટ હાઉસ જવાના રસ્તે રેલ્વે ગરનાળામાં પોલીસ બસ ફસાઈ જતા અલકાપુરી અને સયાજીગંજ વિસ્તારમાં ભારે ટ્રાફિકના દ્રશ્યો સર્જાયા હતા. 

ઉલ્લેખનિય છે કે, અલકાપુરીથી સ્ટેશન તરફ અને સયાજીગંજથી સર્કીટ હાઉસ તરફ જવાના રેલવે ગરનાળાની ઊંચાઈ ઓછી હોવાને કારણે પોલીસ બસનો ઉપરનો ભાગ છત સાથે અથડાયો હતો અને બસ અધવચ્ચે જ અટકી ગઈ હતી. આ ઘટનાને પગલે રેલ્વે સ્ટેશનથી સયાજીગંજ અને અલકાપુરી તરફ જતા માર્ગો પર ભારે ટ્રાફિક જામ સર્જાયો હતો. બસ ફસાઈ જવાથી રસ્તો બ્લોક થઈ ગયો હતો, જેના કારણે ટુ-વ્હીલર અને અન્ય વાહનોની લાંબી કતારો લાગી હતી. ખાસ કરીને ટ્રેન પકડવા જઈ રહેલા મુસાફરો ભારે હાલાકીમાં મુકાયા હતા.

ઘટનાની જાણ થતા જ ટ્રાફિક પોલીસનો કાફલો ઘટના સ્થળે પહોંચી ગયો હતો. બસના ટાયરમાંથી હવા ઓછી કરીને અથવા ક્રેનની મદદથી બસને બહાર કાઢવાની કામગીરી હાથ ધરવામાં આવી હતી. અંદાજે એક કલાકની ભારે જહેમત બાદ વાહનવ્યવહાર ધીમે-ધીમે પૂર્વવત થયો હતો.