દમણ અને દાદરા તથા નગર હવેલીમાં ભારે વરસાદની આશંકા : 1 ઓગસ્ટે તમામ શિક્ષણ સંસ્થાઓ બંધ રાખવા આદેશ

Daman Heavy Rain Alert : ભારતીય હવામાન વિભાગ (IMD), અમદાવાદ દ્વારા 31 જુલાઈ 2026ના રોજ સાંજે જારી કરવામાં આવેલા આગાહી મુજબ, આગામી 24થી 48 કલાક દરમિયાન દમણ તથા દાદરા અને નગર હવેલી જિલ્લામાં ભારેથી અતિભારે અને કેટલાક વિસ્તારોમાં અત્યંત ભારે વરસાદ થવાની શક્યતા વ્યક્ત કરવામાં આવી છે. આસપાસના વિસ્તારોમાં પણ ભારે વરસાદને કારણે જળબંબાકાર, નદી-નાળાઓમાં પૂરની સ્થિતિ અને વાહનવ્યવહાર ખોરવાવાની સંભાવનાને ધ્યાનમાં રાખીને તંત્ર દ્વારા પૂર્વતૈયારી રૂપે અને સુરક્ષાના પગલાં તરીકે મહત્વના નિર્ણયો લેવામાં આવ્યા છે.

દમણ જિલ્લા માટે મહત્વપૂર્ણ સૂચનાઓ

ડેપ્યુટી કલેક્ટર આરતી અગ્રવાલે જારી કરેલા આદેશ મુજબ, 1 ઓગસ્ટે તમામ સરકારી અને ખાનગી શાળાઓ, કોલેજો, પોલિટેકનિક, ITI અને આંગણવાડીઓ વિદ્યાર્થીઓ માટે બંધ રહેશે. મુશ્કેલીના સમયે મદદ કે માહિતી મેળવવા માટે ઈમરજન્સી કન્ટ્રોલ રૂમ નંબર 1077, 0260-2231377, 0260-2253000 અથવા WhatsApp નંબર 8347294342 પર સંપર્ક કરી શકાશે.

દાદરા અને નગર હવેલી માટે મહત્વપૂર્ણ સૂચનાઓ

દાદરા અને નગર હવેલી ડિઝાસ્ટર મેનેજમેન્ટ ઓથોરિટી દ્વારા સબ-ડિવિઝનલ મેજિસ્ટ્રેટ દ્વારા જારી કરાયેલા આદેશ મુજબ, 1 ઓગસ્ટે તમામ સરકારી અને ખાનગી શાળાઓ, કોલેજો, ITI, આંગણવાડી, પોલિટેકનિક તેમજ ટ્યુશન ક્લાસીસ શૈક્ષણિક અને બિન-શૈક્ષણિક સ્ટાફ સહિત બંધ રહેશે. અહીંના નાગરિકો માટે ઈમરજન્સી કન્ટ્રોલ રૂમ નંબર 1077, 0260-2412500 અને 8780001077 કાર્યરત રહેશે.

નાગરિકો માટે સાવચેતીની માર્ગદર્શિકા

વહીવટીતંત્ર દ્વારા તમામ નાગરિકોને સતર્ક રહેવા, પાણી ભરાયા હોય તેવા અથવા પૂરની શક્યતા વાળા વિસ્તારોમાં જવાનું ટાળવા, નદીઓ અને દરિયાકિનારાથી દૂર રહેવા અને તંત્ર દ્વારા આપવામાં આવતી સૂચનાઓનું ચુસ્તપણે પાલન કરવા વિનંતી કરવામાં આવી છે.