રાજ્યના કેટલાક જિલ્લાના વાતાવરણમાં પલટો: સાબરકાંઠાના પોશીનામાં કરા પડ્યા, અમરેલીમાં ગાજવીજ સાથે વરસાદ

Gujarat Weather Update: ગુજરાતમાં સવારથી જ અસહ્ય બફારા અને ભારે ઉકળાટથી નાગરિકો પરેશાન જોવા મળ્યા. જેની વચ્ચે કેટલાક જિલ્લાના લોકોને બપોર પછી મોટી રાહત મળી છે. વાતાવરણમાં અચાનક પલટો સાબરકાંઠાના પોશીના પંથકમાં તો કરા સાથે ધોધમાર વરસાદ પડતાં સમગ્ર પંથકમાં ઠંડક પ્રસરી ગઈ છે. જ્યારે અમરેલી અને વિજયનગર પંથકમાં પણ મેઘમહેર થતાં રસ્તાઓ પર વરસાદી પાણી વહેતા થયા. 

સાબરકાંઠાના પોશીનામાં કરા સાથે વરસાદ 

સાબરકાંઠા જિલ્લાના પોશીના અને તેની આસપાસના વિસ્તારોમાં બપોર પછી આકાશમાં કાળાડિબાંગ વાદળો ઘેરાયા હતા અને જોતજોતામાં કરા સાથે ધોધમાર વરસાદ તૂટી પડ્યો હતો. પોશીના ઉપરાંત દેલવાડા, આંબા મહુડા, ગણેર અને છોછર સહિતના ગ્રામ્ય વિસ્તારોમાં સારો વરસાદ નોંધાયો છે. ગુજરાત-રાજસ્થાન સરહદી વિસ્તારમાં પણ કરા સાથે ભારે વરસાદ પડ્યો છે. પોશીનાના મુખ્ય રસ્તાઓ પર વરસાદી પાણી એટલી ઝડપે વહેવા લાગ્યા હતા કે માર્ગો નદીમાં ફેરવાઈ ગયા હોય તેવો નજારો જોવા મળ્યો હતો.

વિજયનગર પંથકમાં ગાજવીજ સાથે ધીમીધારે મેઘમહેર

સાબરકાંઠાના જ વિજયનગર અને તેની આસપાસના વિસ્તારોમાં પણ સવારથી ભારે બફારા બાદ અચાનક મોસમ બદલાયું હતું. વિજયનગર ટાઉન સહિત ખોખરા, ટીંટારણ અને નાલશેરી જેવા ગ્રામ્ય વિસ્તારોમાં ગાજવીજ સાથે ધીમીધારે વરસાદ શરૂ થયો હતો. અચાનક આવેલા આ વરસાદના કારણે સમગ્ર પંથકમાં ઠંડક પ્રસરી જતાં લોકોને ગરમીમાંથી મોટી રાહત મળી છે.

આ પણ વાંચો: ગુજરાતમાં આગામી 3 દિવસ ભારે પવન-ગાજવીજ સાથે વરસાદનું એલર્ટ, જુઓ હવામાન વિભાગની લેટેસ્ટ આગાહી

અમરેલી: બાબરા પંથકના ગામડાઓમાં વરસાદી એન્ટ્રી

બીજી તરફ સૌરાષ્ટ્રના અમરેલી જિલ્લામાંથી પણ વરસાદના સમાચાર મળી રહ્યા છે. બાબરા પંથકમાં બપોર બાદ વાતાવરણમાં એકાએક પલટો આવ્યો હતો. બાબરાના ઘુઘરાળા સહિતના આસપાસના ગ્રામ્ય વિસ્તારોમાં વરસાદી ઝાપટાં શરૂ થયા છે. લાંબા સમયના અસહ્ય ઉકળાટ બાદ વરસાદ ખાબકતા સ્થાનિક લોકો અને ખેડૂતોમાં આનંદની લાગણી જોવા મળી રહી છે. અચાનક આવેલા આ વરસાદી માહોલને પગલે તાપમાનમાં મોટો ઘટાડો નોંધાયો છે.