Gujarat Weather Update: ગુજરાતમાં હવામાન વિભાગની આગાહી વરદાન સાબિત થઈ હોય તેમ રાજ્યના વાતાવરણમાં મોટો પલટો આવ્યો છે. ગત મોડી રાત્રે અમદાવાદ અને પંચમહાલના શહેરા અને છોટા ઉદેપુર સહિતના વિસ્તારોમાં ભારે પવન અને વીજળીના કડાકા-ભડાકા સાથે વરસાદ ખાબક્યો હતો. લાંબા સમયથી અસહ્ય ગરમી અને બફારાનો સામનો કરી રહેલા સ્થાનિક લોકોને આ વરસાદથી મોટી રાહત મળી છે, અને સમગ્ર પંથકમાં ઠંડક પ્રસરી ગઈ છે.
પંચમહાલના શહેરામાં વીજળીના કડાકા સાથે વરસાદ
પંચમહાલ જિલ્લાના શહેરા અને તેની આસપાસના ગ્રામ્ય વિસ્તારોમાં ગત મોડી રાત્રે અચાનક હવામાન બદલાયું હતું. ભારે પવન અને આકાશમાં વીજળીના ચમકારા સાથે ધમાકેદાર વરસાદ શરૂ થયો હતો. હવામાન વિભાગની આગાહી મુજબ જ શરૂ થયેલા આ વરસાદને કારણે વાતાવરણમાં પ્રસરેલા ઉકળાટમાંથી લોકોને મુક્તિ મળી હતી.
આ પણ વાંચો: IPL ફાઇનલમાં વરસાદી વિઘ્નની શક્યતા! આગામી 5 દિવસ કડાકા-ભડાકા સાથે વરસાદનું એલર્ટ
છોટા ઉદેપુરમાં ભારે પવન સાથે ધોધમાર વરસાદ, વીજળી ગુલ
બીજી તરફ, છોટા ઉદેપુર જિલ્લામાં પણ પવનના સુસવાટા સાથે વરસાદી માહોલ જામ્યો હતો. જેમાં સ્ટેશન વિસ્તાર, પેટ્રોલ પંપ ચોકડી, કસ્બા વિસ્તાર, મેન હાઈવે સહિત આ તમામ વિસ્તારોમાં ધોધમાર વરસાદ વરસ્યો હતો. જોકે, ભારે પવન અને વરસાદની શરૂઆત થતાંની સાથે જ રવિવારે મોડી રાત્રે અનેક વિસ્તારોમાં વીજ પુરવઠો ખોરવાઈ ગયો હતો, જેના કારણે વહીવટી તંત્ર દોડતું થયું હતું.
રાજુલા પંથકમાં વાતાવરણ પલટાયું
અમરેલી જિલ્લાના વાતાવરણમાં પણ આજે (31મી મે) અચાનક પલટો આવ્યો હતો. અસહ્ય અને કાળઝાળ ઉનાળાની ગરમી વચ્ચે રાજુલા પંથકમાં ગાજવીજ સાથે વરસાદ ખાબક્યો હતો. લાંબા સમયથી અસહ્ય બફારા અને ગરમીથી તોબા પોકારી ગયેલા લોકોને આ વરસાદી ઝાપટાથી મોટી રાહત મળી છે અને સમગ્ર વિસ્તારમાં ઠંડક પ્રસરી ગઈ છે.
રાજુલા સહિત આસપાસના ગ્રામ્ય વિસ્તારોના આકાશમાં કાળાડિબાંગ વાદળો ઘેરાયા હતા અને જોતજોતામાં પવન સાથે વરસાદ તૂટી પડ્યો હતો. ખાસ કરીને રાજુલાના હિંડોરણા, છતડિયા, કડિયાળી ગામમાં ધોધમાર વરસાદ નોંધાયો હતો.
સાબરકાંઠામાં મેઘરાજાની ધમાકેદાર બેટિંગ!
સાબરકાંઠા જિલ્લામાં અસહ્ય ઉકળાટ અને અસહ્ય ગરમી બાદ ગત મોડી રાત્રે હવામાનમાં એકાએક પલટો આવ્યો હતો. જિલ્લાના હિંમતનગર, ઈડર, વડાલી, ખેડબ્રહ્મા અને પોશીના સહિતના વિસ્તારોમાં તીવ્ર પવન, વીજળીના કડાકા-ભડાકા અને ગાજવીજ સાથે વરસાદ વરસ્યો હતો. વહેલી સવારે વરસાદ પડ્યા બાદ મોડી રાત્રે ફરી મેઘરાજાએ ધમાકેદાર એન્ટ્રી કરતાં સમગ્ર પંથકમાં ઠંડક પ્રસરી ગઈ છે અને લોકોને અસહ્ય ગરમીમાંથી મોટી રાહત મળી છે. જિલ્લાના 8 તાલુકાઓમાંથી 5 તાલુકાઓમાં વરસાદી માહોલ જોવા મળ્યો હતો. જેમાં ખેડબ્રહ્મામી 18 મિ.મી., વિજયનગરમી 18 મિ.મી., વડાલીમી 22 મિ.મી., ઈડરમી 10 મિ.મી. અને હિંમતનગર 7 મિ.મી વરસાદ નોંધાયો છે.
આજે રાજ્યના 30 જિલ્લામાં વરસાદની આગાહી
હવામાન વિભાગની આગાહી અનુસાર, આજે (31મી મે) પણ ગુજરાતના મોટાભાગના વિસ્તારોમાં મેઘમહેર જોવા મળી શકે છે. રાજ્યના 30 જિલ્લામાં ગાજવીજ સાથે હળવાથી મધ્યમ વરસાદની આગાહી કરવામાં આવી છે. જ્યારે દેવભૂમિ દ્વારકા, પોરબંદર અને જામનગરમાં વરસાદની કોઈ શક્યતા વ્યક્ત કરવામાં આવી નથી.
ચોમાસું ક્યાં પહોંચ્યું? હવામાન વિભાગનું લેટેસ્ટ અપડેટ
ચોમાસાના આગમનની વાત કરીએ તો, દક્ષિણ પશ્ચિમ ચોમાસું આગળ વધી રહ્યું છે. જે અરબી સમુદ્ર, લક્ષદ્વીપ, બંગાળની ખાડી અને બંગાળની ખાડીના ઉત્તરપૂર્વીય ભાગોના નોંધપાત્ર ભાગો સુધી પહોંચી ગયું છે. હવામાન વિભાગ જણાવે છે કે, આગામી 4થી 5 દિવસમાં, ચોમાસું કેરલમ, તમિલનાડુ અને અન્ય નજીકના પ્રદેશોમાં આગળ વધવાની સંભાવના છે. આ સક્રિય ચોમાસાના તબક્કાની અસર દક્ષિણ ભારતના ઘણાં રાજ્યોમાં સ્પષ્ટ થશે, જ્યાં ભારે વરસાદ ચાલુ રહેવાની ધારણા છે.
