Gujarat Heatwave Forecast: રાજ્યમાં ઉનાળો હવે આકરો મિજાજ બતાવી રહ્યો છે. હવામાન વિભાગ દ્વારા આગામી સાત દિવસ માટે ગરમીનું ‘યલો ઍલર્ટ’ જાહેર કરવામાં આવ્યું છે. આગામી 24 કલાક બાદ તાપમાનમાં હજુ પણ 2થી 3 ડિગ્રીનો વધારો થવાની શક્યતા છે, જેને પગલે આકાશમાંથી અગનજ્વાળાઓ વરસતી હોય તેવો અહેસાસ નાગરિકોને થશે.
અમદાવાદમાં ગરમીનો પારો 41 ડિગ્રીને વટાવશે
હાલ સમગ્ર રાજ્યમાં અમદાવાદ સૌથી ગરમ શહેર સાબિત થઈ રહ્યું છે. ગઈકાલે અમદાવાદમાં મહત્તમ તાપમાન 40.8 ડિગ્રી નોંધાયું હતું, જ્યારે આજે પારો 41 ડિગ્રીને પાર જવાની પૂરેપૂરી સંભાવના છે. રાજ્યમાં ફૂંકાઈ રહેલા પશ્ચિમના પવનોને કારણે દરિયાકાંઠાના વિસ્તારોમાં તાપમાનમાં થોડો ઘટાડો હોવા છતાં અસહ્ય બફારાને કારણે લોકો પરસેવે રેબઝેબ થઈ રહ્યા છે.
મતદાનના દિવસે કેવું રહેશે વાતાવરણ?
આગામી 26મી તારીખે રાજ્યમાં લોકસભા ચૂંટણીનું મતદાન યોજાવાનું છે, ત્યારે હવામાન વિભાગની આગાહી મુજબ તે દિવસે વાતાવરણ સંપૂર્ણપણે શુષ્ક રહેશે. મતદાનના દિવસે રાજ્યનું તાપમાન 40થી 43 ડિગ્રીની વચ્ચે રહેવાની શક્યતા છે. દરિયાકાંઠાના વિસ્તારોમાં પારો 37થી 40 ડિગ્રીની આસપાસ રહેશે, પરંતુ બફારાના કારણે મતદારોએ આકરી ગરમીનો સામનો કરવો પડી શકે છે.
