Gujarat Police Humanity Story: નડીયાદ જિલ્લા જેલ અને આણંદ ડિસ્ટ્રિક્ટ લીગલ સર્વિસીસ ઑથોરિટી (DLSA) દ્વારા એક પરપ્રાંતિય મહિલા અને તેના નવજાત બાળકને સુરક્ષિત રીતે મધ્ય પ્રદેશમાં તેમના પરિવાર સાથે પુનઃમિલન કરાવવામાં આવ્યું છે. પોક્સો (POCSO) કેસમાં જેલમાં બંધ આ ગર્ભવતી મહિલાને કોર્ટે જામીન આપ્યા હતા, પરંતુ ગરીબી અને મજબૂરીના કારણે તેને ઘરે લઈ જવા માટે પરિવારનો કોઈ સભ્ય આવી શક્યો ન હતો. આ કપરી પરિસ્થિતિમાં ગુજરાત પોલીસે સંવેદનશીલતા દાખવી મહિલાને સન્માનપૂર્વક તેના ઘરે પહોંચાડી છે.
શું હતો સમગ્ર મામલો?
મધ્ય પ્રદેશના અલીરાજપુર જિલ્લાની વતની આ મહિલા પોતાના પરિવાર સાથે મજૂરી કામ અર્થે ગુજરાત આવી હતી. આણંદ જિલ્લાના ખંભાત શહેરમાં સગીરાના અપહરણના એક કથિત કેસમાં તેના પતિ અને દિયરની સાથે આ મહિલાને પણ સહ-આરોપી બનાવવામાં આવી હતી. જ્યારે તેને નડીયાદ જિલ્લા જેલમાં લાવવામાં આવી, ત્યારે તે ગર્ભવતી હતી અને તેની સાથે તેનું બે વર્ષનું બાળક પણ હતું. જેલવાસ દરમિયાન, 21 મેના રોજ મહિલાને પ્રસૂતિની પીડા ઉપડતાં તેને નડીયાદ સિવિલ હૉસ્પિટલ અને બાદમાં અમદાવાદ સિવિલ હૉસ્પિટલ ખસેડવામાં આવી હતી, જ્યાં તેણે એક સ્વસ્થ બાળકને જન્મ આપ્યો હતો. હૉસ્પિટલમાંથી રજા મળ્યા બાદ તે પોતાના નવજાત પુત્ર અને બે વર્ષના બાળક સાથે જેલમાં પરત ફરી હતી.
જામીન મળ્યા પણ ઘરે જવાના પૈસા નહોતા
સ્થાનિક અદાલતે માનવતાના ધોરણે મહિલાને જામીન મુક્ત કરવાનો આદેશ કર્યો હતો. પરંતુ, તેનો પતિ અને દિયર હજુ પણ જેલમાં જ હોવાથી અને પરિવારની અત્યંત નબળી આર્થિક સ્થિતિના કારણે, તેને વતન લઈ જવા માટે કોઈ સગા-સંબંધિઓ આવી શક્યા ન હતા. મહિલા પાસે વતન પરત ફરવા માટે ભાડાના પણ પૈસા ન હતા. આ ગંભીર અને સંવેદનશીલ પરિસ્થિતિ આણંદના ડિસ્ટ્રિક્ટ લીગલ સર્વિસીસ ઑથોરિટીને(DLSA) ધ્યાનમાં આવી હતી. તેમણે તાત્કાલિક જેલ પ્રશાસનનો સંપર્ક કર્યો અને મહિલાની નાજુક તબિયત તેમજ નવજાત બાળકની જરૂરિયાતોને ધ્યાનમાં રાખીને તેને સુરક્ષિત રીતે વતન મોકલવા વિનંતી કરી.
ગુજરાત પોલીસે કરી ખાસ વાહનની વ્યવસ્થા
નડીયાદ જિલ્લા જેલ પ્રશાસને એક સ્થાનિક સામાજિક સંસ્થાના સહયોગથી મહિલા અને તેના બાળકો માટે વાહનની વ્યવસ્થા કરી આપી. એટલું જ નહીં, મહિલાની સુરક્ષા માટે બે પોલીસ કોન્સ્ટેબલોને પણ તેની સાથે મધ્ય પ્રદેશના અલીરાજપુર સુધી મોકલવામાં આવ્યા હતા. મહિલા જ્યારે પોતાના ગામે પહોંચી ત્યારે સ્થાનિક પોલીસને જાણ કરીને કાનૂની પ્રક્રિયા પૂર્ણ કર્યા બાદ તેને પરિવારને સોંપવામાં આવી હતી.
