દૂષ્કર્મના કેસમાં ફીટ કરાવવાની ધમકી આપી હતી
સાડી ખરીદયા બાદ બીજા દિવસે મહિલાએ કોલ કરી 'તમે મારો હાથ પકડયો હતો' તેમ કહી બ્લેકમેઈલિંગ શરૂ કર્યું હતું
વૃધ્ધ વેપારી પાસે ગઈ તા.૧૦ના રોજ એક મહિલા બે સાડીની ખરીદી કરી ગઈ હતી. તે વખતે મોબાઈલ નંબર પણ લેતી ગઈ હતી. બીજા દિવસે વેપારીને કોલ કરી તમે મારો હાથ પકડયો હતો, દૂષ્કર્મના કેસમાં ફીટ કરાવી દઈશ તેવી ધમકી આપી પૈસાની માંગણી કરી હતી. તે મહિલા સાથે બીજી એક મહિલા અને પુરૂષે પણ વેપારીની દુકાને જઈ તેને બ્લેકમેઈલ કર્યા હતા. આ ટોળકીએ વેપારી પાસેથી કટકે-કટકે રૂા.ર૦ હજાર પડાવ્યા હતા.
હજુ પણ વધુ પૈસાની માંગણી કરતા હોવાથી વેપારીએ પોલીસનો સંપર્ક કર્યો હતો. જેના આધારે પોલીસે ગુનો નોંધી ત્રણેય આરોપીઓની ધરપકડ કરી હતી. જેમાં મૂળ ઓરિસ્સાની અને હાલ જેતપુર રહેતી મમતાસિંગ પ્રદિપસિંગ રાજપુત, જેતપુરમાં ભાદરના સામાકાંઠે રહેતી રમાબા વિજયસિંહ જાડેજા અને જેતપુરના ઘેટાવાળા પ્લોટમાં રહેતા મહેબુબ અશરફ મકવાણાનો સમાવેશ થાય છે.
આ ત્રણેય આરોપીઓ પાસેથી પોલીસે ત્રણ મોબાઈલ ફોન, બાઈક અને રોકડા રૂા.૧૧ હજાર કબજે કર્યા છે. અન્ય કોઈને શિકાર બનાવ્યા છે કે કેમ તે બાબતે પોલીસે તપાસ હાથ ધરી છે.
આરોપીઓ અવાર-નવાર વેપારીની દુકાને પણ જતા હતા. એટલું જ નહીં બૂમાબૂમ કરી તમાશો પણ કરતા હતા. આરોપીઓનો ત્રાસ વધી જતાં આખરે વેપારીએ ફરિયાદ નોંધાવી હતી.
