નવાગામમાં ડીઝલ ઓટો કોર્પોરેશન પેઢીના સંચાલકો સામે ગુનો
ઓટોમોબાઇલના વેપારી છેતરાયા, રૂા. 32 લાખનું રોકાણ કરતાં માત્ર રૂા. 3.50 લાખ પરત મળ્યાં
રાજકોટ: રોકાણ ઉપર ઊંચુ વળતર આપવાની લાલચ આપી કાર એક્સેસરીઝના ધંધાર્થી નિમેષભાઈ જગજીવનભાઈ રૂઘાણી (ઉ.વ.૫૫) સાથે ડીઝલ ઓટો કોર્પોરેશનના સંચાલક મહેન્દ્ર મહેતા, તેનો પુત્ર હિતેશ અને પૌત્ર નમન ઉપરાંત ચંપકે રૂા. ૨૮.૫૦ લાખની છેતરપિંડી કર્યાની એ ડિવિઝન પોલીસ મથકમાં ફરિયાદ નોંધાઇ છે. જેના આધારે પોલીસે તપાસ આગળ ધપાવી છે.
કાલાવડ રોડ પરના સ્વામિનારાયણ મંદિર સામે હરિહર સોસાયટી-૧માં રહેતા નિમેષભાઈ ટાગોર રોડ પર પુનિત કાર એક્સેસરીઝ નામે દુકાન ધરાવે છે. પેઢીનું નામ પુનિત ટ્રેડ લીંક છે. તેણે પોલીસને જણાવ્યું કે મહેન્દ્રભાઈ નવાગામ જકાતનાકાની સામે ડીઝલ ઓટો કોર્પોરેશન નામે ઓટોમોબાઇલ્સનો ધંધો કરે છે. જેને કારણે તેને ઓળખે છે. ફેબુ્રઆરી-૨૦૨૪માં રૂબરૂ મળી તેને કહ્યું કે તે માત્ર ૨૦ અંગત મિત્રો અને સંબંધીઓ માટે એક સ્કીમ તૈયાર કરી રહ્યા છે.
જેમાં માત્ર ૯ મહિનામાં વાર્ષિક ૧૨ ટકા જેવું ઊંચુ વળતર મળશે.વહેલો તે પહેલાના ધોરણે સભ્યો બનાવવામાં આવી રહ્યાં છે. આ રીતે સ્કીમ સમજાવી હતી. સાથોસાથ પોતાની પેઢીના લેટરપેડ ઉપર લખાણ કરી આપ્યું હતું. જે મુજબ રૂા. ૯.૭૫ લાખનું રોકાણ કરવાથી ૧૩ મહિના પછી રૂા. ૧૦.૫૦ લાખ મળવાના હતાં. દર મહિને રૂા. ૭૫ હજારનો હપ્તો આવશે તેમ પણ કહ્યું હતું. આ રીતે સ્કીમમાં સામેલ થઇ ગયા હતાં.
સ્કીમનો હપ્તો લેવા મહેન્દ્રભાઈનો પુત્ર હિતેશ અને પૌત્ર નમન આવતા હતા. થોડા દિવસો બાદ તેણે વધુ રૂા. ૨૨.૨૫ લાખ રોક્યા હતા. ૧૦ મહિના પછી નફા સહિત રૂા. ૨૫ લાખ મળશે તેમ કહ્યું હતું. જેનું લખાણ પણ કરી આપ્યું હતું. આ રીતે તેણે કુલ રૂા. ૩૨ લાખ રોક્યા હતાં. જેમાંથી તેને કટકે-કટકે રૂા. ૩.૫૦ લાખ પરત મળ્યા હતાં. બીજા ચેક રિટર્ન થયા હતાં. ત્યાર પછી મૂળ રકમ અને વળતર પણ પરત આપતા ન હોવાથી આખરે ફરિયાદ નોંધાવી હતી.
