Jamnagar Fire News : જામનગર જિલ્લા પંચાયતના બીજા માળે આવેલી આરોગ્ય વિભાગની કચેરીમાં આજે વહેલી સવારે શોર્ટ સર્કિટના કારણે અચાનક આગ ફાટી નીકળી હતી. આગે જોતજોતામાં વિકરાળ સ્વરૂપ ધારણ કરી લેતા કચેરીમાં રહેલા કોમ્પ્યુટરો અને દસ્તાવેજો બળીને ખાખ થઈ ગયા હતા. ફાયર બ્રિગેડની ટીમે સમયસર પહોંચીને આગ પર કાબૂ મેળવતા મોટી હોનારત ટળી હતી.
સિક્યુરિટી ગાર્ડની સતર્કતાથી મોટી જાનહાનિ ટળી
આગની આ ઘટના વહેલી સવારે બની હતી. જિલ્લા પંચાયતના સિક્યુરિટી વિભાગના પૃથ્વીરાજસિંહ જાડેજાએ સવારે 6:38 મિનિટે કચેરીમાંથી ધુમાડા નીકળતા જોયા હતા અને તુરંત જ ફાયર બ્રિગેડને જાણ કરી હતી. સદભાગ્યે કચેરીનો સમય ન હોવાથી સ્ટાફ હાજર ન હતો, જેના કારણે મોટી જાનહાનિ ટળી હતી.
ફાયર બ્રિગેડનું ક્વિક એક્શન
કોલ મળતાની સાથે જ સ્ટેશન ફાયર ઓફિસર જે.કે. ડામોર પોતાની ટીમ સાથે ઘટનાસ્થળે દોડી ગયા હતા. બીજા માળે લાગેલી આગને બુઝાવવા માટે સતત પાણીનો મારો ચલાવવામાં આવ્યો હતો. ફાયર જવાનોની સમયસૂચકતાને કારણે આગ આરોગ્ય વિભાગની ઓફિસ પૂરતી મર્યાદિત રહી હતી અને અન્ય સરકારી વિભાગોમાં પ્રસરતા અટકી હતી.
લાખોનું સરકારી મિલકતને નુકસાન
આગ એટલી ભીષણ હતી કે આરોગ્ય વિભાગની DPMU બ્રાન્ચમાં રાખવામાં આવેલા 10 મોંઘા કોમ્પ્યુટર, 10 પ્રિન્ટર, કચેરીનું ફર્નિચર અને મહત્વના સરકારી રેકોર્ડ્સ બળીને રાખ થઈ ગયા છે. પ્રાથમિક અંદાજ મુજબ નવ લાખથી વધુનું નુકસાન થયું હોવાનું માનવામાં આવે છે. ઘટનાની જાણ થતા જ આરોગ્ય વિભાગના ઉચ્ચ અધિકારીઓ દોડી આવ્યા હતા અને નુકસાનનો ચોક્કસ સર્વે કરવાની કામગીરી હાથ ધરી છે.
