Fake Doctors in Gujarat: ગુજરાતમાં છેવાડાના વિસ્તારોમાં આરોગ્યની સેવા હજુ પણ અધ્ધરતાલ રહી છે જેના કારણે ગરીબ દર્દીઓ બોગસ ડૉક્ટરોના સહારે છે. ભ્રષ્ટ આરોગ્ય વિભાગની નિષ્ક્રિયતાને પગલે ગ્રામ્ય-આદિવાસી, પછાત વિસ્તારોમાં ઝોલાછાપ ડૉક્ટરોની ભરમાર રહી છે. છેલ્લા ત્રણેક વર્ષમાં ગુજરાતમાંથી કુલ મળીને 2724 ઝોલાછાપ ડૉક્ટરો પકડાયા છે. હજુ પણ રાજ્યમાં ઘણા ઠેકાણે લાયકાત વિનાના ડૉક્ટરો દર્દીઓની સારવાર કરી રહ્યા છે.
નાના ક્લિનિકથી લઈ મોટી હોસ્પિટલો માટે હવે રજીસ્ટ્રેશન ફરજિયાત
ગુજરાત વિધાનસભામાં 'ગુજરાત ક્લિનિકલ એસ્ટાબ્લિશમેન્ટ બિલ-2026' પસાર થયું છે. હવે નાના ક્લિનિકથી માંડીને મલ્ટી સ્પેશિયાલિટી હોસ્પિટલો, લેબોરેટરીઓએ રજીસ્ટ્રેશન કરાવવું ફરજિયાત છે. આ નિયમનો ભંગ કરનારાને રૂ. 10 હજારથી માંડીને 5 લાખ સુધીનો દંડ ફટકારાશે. આ બિલ પાછળનો હેતુ એ છે કે, લાયકાત વિનાની વ્યક્તિ દર્દીની સારવાર કરી શકે નહીં અને આરોગ્ય સેવાની ગુણવત્તા જળવાઈ રહે.
3 વર્ષમાં સૌથી વધુ 221 બોગસ ડૉક્ટરો ઝડપાયા
રાજ્યમાં ડિગ્રી વિના તબીબી પ્રેક્ટિસ કરતા નકલી ડૉક્ટરોની ભરમાર રહી છે. ખુદ આરોગ્ય વિભાગે કબૂલ્યું કે, સમગ્ર રાજ્યમાં સૌથી વધુ ઝોલાછાપ ડૉક્ટરો નવસારી જિલ્લામાંથી પકડાયા છે. છેલ્લા ત્રણેક વર્ષમાં આ જિલ્લામાંથી 221 બોગસ ડૉક્ટરો પકડાયા હતા. આ ઉપરાંત અમદાવાદ, અમરેલી, આણંદ, ખેડા, નર્મદા સહિત અન્ય જિલ્લામાં નકલી ડિગ્રીધારી ડૉક્ટરો બેફામ રીતે તબીબી પ્રેક્ટિસ કરતા ઝડપાયા હતા.
આ પણ વાંચો: સચિવાલય-બોર્ડ નિગમ ઘરડાઘરમાં તબદીલ! શિક્ષિત યુવાઓને ફાંફા, મળતિયાઓને ફરી તક
આરોગ્ય વિભાગની કડક કાર્યવાહી
મહત્ત્વની વાત છે કે, વર્ષ 2021માં 839 નકલી ડૉક્ટરો પકડાયા હતા જ્યારે આ સંખ્યા વધીને વર્ષ 2023માં 1010 સુધી પહોંચી હતી. આનો અર્થ એ કે, ગુજરાતમાં હજુ નકલી ડૉક્ટરોની સંખ્યા ઘણી મોટી છે. આ ઉપરાંત તપાસ કરતા એવું બહાર આવ્યું કે, 169 ડૉક્ટરો પાસે તો નકલી ડિગ્રી હોવાનું પુરવાર થયું હતું. આરોગ્ય વિભાગે દાવો કર્યો કે, 154 નકલી ડૉક્ટરો વિરુદ્ધ પોલીસ ફરિયાદ કરવામાં આવી છે. ચાર નકલી ડૉક્ટરો હજુ પકડાયા નથી. જ્યારે ડિગ્રી વિનાના 6 ડૉક્ટરો તો ધરપકડની બીકે દવાખાના બંધ કરીને ફરાર થયા છે.
