Surat Dumas Sea Face Project : સુરત પાલિકાના ડ્રીમ પ્રોજેક્ટ બનેલો ડુમસ સી-ફેસ શરૂ થતાં જ સ્વચ્છતા મુદ્દે વિવાદોમાં આવી ગયો છે. ખાસ કરીને વીકએન્ડ દરમિયાન મોટી સંખ્યામાં લોકો અહીં ફરવા પહોંચે છે, પરંતુ ત્યારબાદ વિસ્તાર કચરાના ઢગલામાં ફેરવાઈ જતો હોવાના દ્રશ્યો સામે આવી રહ્યા છે. સ્વચ્છતામાં દેશમાં આગવી ઓળખ ધરાવતી સુરત પાલિકા માટે આ સ્થિતિ હવે પડકારરૂપ બની ગઈ છે.
166 કરોડના ખર્ચે વિકસાવવામાં આવેલ આ પ્રોજેક્ટમાં પ્રથમ જ વીકએન્ડ બાદ પાલિકાએ અંદાજે 300 કિલો કચરો ઉઠાવ્યો હતો. સતત વધતી ગંદકીના કારણે પ્રોજેક્ટની જાળવણી મુશ્કેલ બની રહી છે. લોકો ફરવા આવે છે, પરંતુ કચરાનો યોગ્ય નિકાલ કર્યા વગર ફેંકી જતા હોવાથી સમગ્ર વિસ્તારની સ્વચ્છતા બગડી રહી છે.
આ પરિસ્થિતિને ધ્યાનમાં રાખીને પાલિકાએ હવે ડુમસ સી-ફેસને ‘કચરા મુક્ત વિસ્તાર’ જાહેર કરવાની તૈયારી હાથ ધરી છે. ગંદકી ફેલાવનારાઓ સામે કડક કાર્યવાહી કરવા માટે સ્પષ્ટ આયોજન કરવામાં આવ્યું છે. જો કોઈ વ્યક્તિ કચરો ફેંકતા પકડાશે તો તેની સામે દંડ સહિત વહીવટી ખર્ચ વસૂલવામાં આવશે.
સાથે સાથે હવે ટેકનોલોજીનો સહારો પણ લેવામાં આવશે. સમગ્ર વિસ્તારમાં હાઈ-ડેફિનેશન સીસીટીવી કેમેરા લગાવવામાં આવશે, જેનુ મોનીટરીંગ પાલિકાના આઈસીસીસી સેન્ટર પરથી કરવામાં આવશે. કેમેરાની મદદથી કચરો ફેંકતા લોકોને ઓળખીને તેમના સામે તરત જ કાર્યવાહી કરવામાં આવશે.
આ ઉપરાંત સ્થળ પર 20 થી 30 જેટલા માર્શલની નિમણૂક કરવામાં આવશે, જે લોકોમાં જાગૃતિ ફેલાવવાની સાથે કચરો ફેંકતા રોકશે. પાલિકાનો દાવો છે કે આ કડક પગલાં બાદ ડુમસ સી-ફેસને સ્વચ્છ અને સુવ્યવસ્થિત બનાવવામાં સફળતા મળશે.
વીક એન્ડમાં વિવિધ એન.જી.ઓ. સફાઈ અભિયાન કરશે
ડુમસ સી ફેસ પ્રોજેક્ટમાં થતી ગંદકી અટકાવવા માટે પાલિકા દ્વારા ડુમસ સી ફેસના અલગ-અલગ ઝોનની જવાબદારી વિવિધ એન.જી.ઓ.ને કરવામાં આવશે. એન.જી.ઓ. કે વિદ્યાર્થીઓ દ્વારા મુલાકાતીઓને સ્વચ્છતાના પાઠ ભણાવવામાં આવશે અને વિવિધ લોકજાગૃતિના પ્રયાસ કરવામાં આવશે. જેમાં આ વિસ્તારમાં મોટી સ્કીમ મુકી તેના પર સ્વચ્છતાના સંદેશા સાથે I Support Litter-Free Dumas થીમ આધારિત સેલ્ફી પોઈન્ટ પણ બનાવવામાં આવશે.
એન્ટ્રી પોઇન્ટ પર જ પ્રતિબંધિત પ્લાસ્ટિકની તપાસ કરાશે
સુરત પાલિકાના નેચર પાર્કની જેમ જ ડુમસ સી ફેસ વિસ્તાર કચરા ફ્રી સાથે પ્લાસ્ટિક ફ્રી બનાવવાની કવાયત શરૂ થઈ છે. જેના ભાગરુપે મુલાકાતીઓ પાસેથી પ્રતિબંધિત પ્લાસ્ટિક લઈ લેવામાં આવશે. જેમની પાસે પ્રતિબંધિત પ્લાસ્ટિક મળશે તે જપ્ત કરવા સાથે દંડનીય કાર્યવાહી પણ કરવામાં આવશે.
